Jekemenshik mektepterdi qarjylandyrýǵa qatysty mindettemeler oryndalady — mınıstr
ASTANA. KAZINFORM — Oqý-aǵartý mınıstri Juldyz Súleımenova jekemenshik mektepterdi qarjylandyrý salasyndaǵy problemaǵa túsinik berdi.
— 2025 jylǵa deıin jekemenshik mektepter respýblıkalyq bıýdjetten qarjylandyrylyp keldi. Bıýdjet kodeksindegi ózgeriske sáıkes, ár balaǵa bólinetin qarajat bar. Qarajat jergilikti atqarýshy organdarǵa tıesili. Sondyqtan eki kózden qarjylandyrý bolmas úshin 2025 jyldan jergilikti organdar tarapynan júzege asyrylýy tıis degen sheshim boldy. Maýsym aıynda qarjy ortalyǵy óziniń ótinimin ashýy kerek edi, soǵan sáıkes jekemenshik mektepter qujatty toltyrýy tıis. Budan keıin, osy ótinimderdi 60 kúnniń ishinde qarastyrýy qajet. Maýsym aıynda ótinimder ashylmaı, jańa oqý jyly bastalyp ketken. 29 qyrkúıekte mınıstr qyzmetine kirisken kezimde, vedomstvoǵa jekemenshik mektepterdiń ókilderi keldi. Bul máseleni Premer-mınıstr deńgeıinde kóterdik, — dedi J. Súleımenova Parlament Májilisinde tilshiler suraǵyna jaýap bere otyryp.
Onyń aıtýynsha, byltyr memlekettik tapsyrys aıasynda 745 jekemenshik mektep qarjy alǵan.
— Al bıyl osyndaı 917 mektep boldy, ıaǵnı 100-den astamy jańa jekemenshik mektep retinde tirkeldi. Olardyń barlyq qarajatyn egjeı-tegjeıli eseptedik. Sonyń arasynda jergilikti atqarýshy organdarynan jáne respýblıkalyq bıýdjetten qarjylandyrylatyn mektepterdi talqyladyq. Taıaýda tıisti pılottyq buıryq bolady, ıaǵnı oǵan qol qoıylǵannan keıin, jaqynda qarajat aýdarylady. Atap aıtqanda, pılottyq joba bolǵandyqtan, ákimdikter de jaýapkershilikti bekitsin dep otyrmyz. Sondyqtan ákimdikter de tıisti qujatqa qol qoıyp jatyr. Jalpy, memlekettiń barlyq mindettemesi oryndalady, — dedi mınıstr.
Budan bólek vedomstvo basshysy jekemenshik mektepter jaǵynan bolǵan kemshilikti atady.
— Jekemenshik mektepterdiń arasynda zeınetaqy qoryna nemese MÁMS-ke jarnany aýdarmaǵandar kezdesip jatyr. Memleket óziniń mindettemesin oryndaıdy. Biraq jekemenshik mektepter de ustazdardyń aldyndaǵy eńbek zańnamasyn oryndaýy tıis, — dedi Juldyz Súleımenova.
Eske salsaq, bıyl 29 qyrkúıekte Juldyz Súleımenova Qazaqstan Respýblıkasynyń Oqý-aǵartý mınıstri bolyp taǵaıyndaldy.