Jekemenshik mektepterdi qarjylandyrý júıesi jańartylyp jatyr — Oqý-aǵartý mınıstrligi
ASTANA. KAZINFORM — QR Oqý-aǵartý vıtse-mınıstri Jaıyq Sharbasov Ortalyq kommýnıkatsııalar qyzmeti alańynda jekemenshik bilim berý júıesin damytý men memlekettik bilim berý tapsyrysyn ornalastyrý tetikterin jetildirýge qatysty málimdeme jasady.
Onyń aıtýynsha, jekemenshik bilim berý uıymdarynyń damýy birqatar óńirde oqýshy oryndarynyń tapshylyǵyn azaıtýǵa, jańa formattaǵy zamanaýı mektepterdi ashýǵa jáne balalardyń sapaly bilimge qoljetimdiligin keńeıtýge múmkindik berip otyr.
Sonymen birge, jekemenshik mektepterde memlekettik bilim berý tapsyrysyn ornalastyrý júıesin odan ári jetildirý qarjylandyrýdyń ashyqtyǵy, tıimdiligi jáne maqsattylyǵy qaǵıdattaryna negizdelgen jańa tásilderdi engizýdi talap etedi.
— Bul baǵyttaǵy mańyzdy jańalyqtardyń biri — 2025 jylǵy 12 qarashadan bastap «OrtaBilim» servısiniń iske qosylýy boldy. Atalǵan júıe lıtsenzııalyq talaptardyń saqtalmaýy, jobalyq qýattan artyq oqýshy qabyldaý, oqýshylardy qosarly esepke alý jáne aqparattyq qaýipsizdik talaptaryna sáıkes kelmeıtin LMS júıelerin paıdalaný sııaqty táýekelderdi barynsha azaıtýǵa múmkindik berdi, — dedi spıker.
Vedomstvo ókili 2026 jylǵy 1 qańtardan bastap jańadan ashylǵan jekemenshik mektepter boıynsha memlekettik bilim berý tapsyrysyn ornalastyrýǵa jáne ǵımarat amortızatsııasyna qatysty shyǵyndardy qarjylandyrýǵa (A2 jáne A3 komponentteri) jańa mindettemeler qabyldaýǵa moratorıı engizildi. Bul shara bıýdjet qarajatynyń turaqtylyǵyn qamtamasyz etip, shyǵystardyń negizsiz ósýin tejeýge baǵyttalǵanyn atap ótti.
Sondaı-aq memleket qoldanystaǵy jekemenshik mektepter aldyndaǵy mindettemelerin oryndaýdy jalǵastyryp otyr. Jyl basynan beri pılottyq joba aıasynda 749 jekemenshik mektepke 100 mlrd teńgeden astam qarjy tólengen.
Vıtse-mınıstrdiń aıtýynsha, endi memlekettik qarajatty paıdalanýdyń tıimdiligi men nysanaly baǵyttalýyna erekshe mán berilmek. Osyǵan sáıkes, memlekettik bilim berý tapsyrysy tek naqty oqýshy orny tapshylyǵy bar óńirlerdegi jekemenshik mektepterge ǵana ornalastyrylýy tıis. Bul rette memlekettik mektepterdiń jetispeýi, apatty jáne úsh aýysymdy mektepterdi joıý qajettiligi, sondaı-aq memlekettik bilim berý standarttarynyń sapaly oryndalýy sııaqty ólshemder eskeriledi.
Buǵan deıin bilim berý salasyndaǵy memlekettik qoldaý jekemenshik mektepterdi de qamtıtynyn jazǵanbyz.
