Jekemenshik mektepterdi qarjylandyrý boıynsha anyqtalǵan zańbuzýshylyqtar 13 mlrd teńgeden asty
ASTANA. KAZINFORM – Qarjy vıtse-mınıstri Dáýren Temirbekov Ortalyq kommýnıkatsııalar qyzmeti alańynda ótken brıfıngte jańa qarjylandyrý tetigi men júrgizilgen aýdıt nátıjelerine toqtaldy.
Onyń aıtýynsha, Іshki memlekettik aýdıt komıteti burynǵy kezeńder boıynsha tekserý júrgizip, 2026 jyldyń sáýirinde aıaqtalǵan aýdıt qorytyndysy boıynsha 13 mlrd teńgeden astam somaǵa zańbuzýshylyqtar anyqtalǵan.
Vıtse-mınıstr zańbuzýshylyqtardyń negizgi baǵyttaryn atap ótip, qabyldanyp jatqan sharalarǵa toqtaldy.
Birinshi másele – burynǵy júıede óńirlerdiń naqty qajettiligi eskerilmegeni.
– Jekemenshik mektepterdiń damýy jasandy túrde burmalanyp, bastaýysh býynǵa baǵyttalǵan. Árbir úshinshi mektep tek 1-4 synyp oqýshylaryna arnalǵan formatta ashylǵan, – dedi ol.
Onyń dereginshe, sonyń saldarynan 2024 jyly oqýshy oryndarynyń tapshylyǵy joq 7 óńirge, sonyń ishinde Aqmola, Batys Qazaqstan, Qaraǵandy jáne ózge oblystarǵa 1,8 mlrd teńge kóleminde qarjy bólingen.
Vıtse-mınıstr jańa pılottyq tetik aıasynda memlekettik tapsyrysty ornalastyrý ókilettigi jergilikti bilim basqarmalaryna berilgenin atap ótti.
– Joǵaryda aıtqanymdaı, memlekettik tapsyrysty ornalastyrý ókilettigi Bilim basqarmalaryna berilýine baılanysty, pılottyq jobada oqýshy oryndaryna qajettilikti tikeleı jergilikti atqarýshy organdardyń anyqtaýy naqty kózdelgen. Eger memlekettik mektepterde oryn profıtsıti baıqalsa, ákimdiktiń jekemenshik mekteppen shart jasaspaýǵa quqyǵy bar. Budan bylaı qajettilik joq óńirlerge bıýdjet aqshasy berilmeıdi, – dedi Dáýren Temirbekov.
Ekinshi másele – oqýshylar kontıngentin jasandy túrde ulǵaıtý faktileri.
– Oqýshylar kontıngentin 261 mln teńgege jasandy túrde asyra kórsetý faktisi anyqtaldy – 41 mektepte 1200-den astam oqýshy «qosyp jazylǵan», – dedi vıtse-mınıstr.
Mysal retinde Almaty oblysynda bir mektepte 90 oqýshy artyq esepke alynyp, 29,4 mln teńge zalal keltirilgeni, al Astana qalasynda bir mektepte 75 oqýshy artyq kórsetilip, 18 mln teńge shyǵyn anyqtalǵany aıtyldy.
Sonymen qatar balalardyń bir oqý jylynda 12 retke deıin negizsiz aýysý jaǵdaılary tirkelgen.
– Derekterdi tolyq tsıfrlandyrý júrgizilip, «e-Qazyna» júıesiniń úlgerimdi esepke alý júıelerimen jáne basqa da memlekettik organdardyń derekqorlarymen avtomatty ıntegratsııalaý qamtamasyz etildi, – dedi ol.
Vıtse-mınıstrdiń aıtýynsha, endi oqýshylar kontıngentin tekserý naqty ýaqyt rejıminde júrgiziledi.
– Adamı faktor men qolmen qosyp jazý múmkindigi tehnıkalyq turǵydan tolyq joıyldy, – dep túıindedi ol.
Aıta keteıik, jekemenshik mektepterdi qarjylandyrý júıesi jańartylyp jatyr.
