Jekemenshik mektepter sanynyń qarqyndy ósýi birqatar júıeli kemshiliktiń bar ekenin kórsetti
ASTANA. KAZINFORM — Qarjy mınıstrligi múddeli memlekettik organdarmen birlesip, anyqtalǵan kemshilikterdi joıý jáne aldaǵy ýaqytta olardyń qaıtalanýyna jol bermeý maqsatynda bıýdjet qarajatyn bólý tetigin túbegeıli qaıta qarady.
Bul týraly Qarjy vıtse-mınıstri Dáýren Temirbekov Ortalyq kommýnıkatsııalar qyzmeti alańynda ótken brıfıngte málim etti.
Onyń aıtýynsha, «Bilimge» biryńǵaı qarjylandyrý portaly negizinde pılottyq jobany iske asyrýdyń arnaıy tetigi engizilgen.
— Portaldyń negizgi maqsaty — barlyq ákimshilik protsesti tsıfrlyq formatqa kóshirý, avtomattandyrylǵan baqylaýdy qamtamasyz etý jáne bıýdjet qarajatynyń maqsatty ári tıimdi jumsalýyna kepildik berý, — dedi vıtse-mınıstr.
Sonymen qatar ol jekemenshik mektepter sanynyń qarqyndy ósýi buryn qoldanylǵan qarjylandyrý tetigindegi birqatar júıeli kemshilikterdiń bar ekenin kórsetkenin atap ótti.
Vıtse-mınıstrdiń dereginshe, 2020–2025 jyldar aralyǵynda jekemenshik mektepterdiń sany 203-ten 745-ke deıin ósip, 3,7 esege artqan. Al oqýshylar kontıngenti 53 myńnan 297 myńǵa deıin kóbeıgen.
Onyń aıtýynsha, bul úrdis qarjylandyrý júıesine túsetin júktemeni aıtarlyqtaı arttyryp, qoldanystaǵy modeldi jańǵyrtý qajettigin aıqyndaǵan.
Sondaı-aq spıker ótken jyly qarjylyq rásimderdiń ashyqtyǵyn kúsheıtý, baqylaýdy arttyrý jáne bıýdjet qarajatyn ákimshilendirýge biryńǵaı tásildi engizý maqsatynda «Qarjy ortalyǵy» aktsıonerlik qoǵamy Qarjy mınıstrliginiń qaramaǵyna berilgenin eske saldy.
Aıta keteıik jekemenshik mektepterdi qarjylandyrý júıesi jańartylyp jatyr.
