Jekemenshik mektepter ataýy onomastıkalyq komıssııanyń sheshimimen beriledi - Májilis

ASTANA. KAZINFORM – Búgin Májilistiń jalpy otyrysynyń birinshi oqylymynda onomastıka týraly zań jobasy qaralyp jatyr.

- Zań jobasynyń mańyzdy baǵyttarynyń biri – jekemenshik bilim berý uıymdaryna tulǵalardyń esimin berý jáne ony ózgertý protsesin onomastıkalyq komıssııamen kelisý tártibin engizý. Sońǵy jyldary jekemenshik bilim berý mekemeleri kóbeıip, sáıkesinshe olarǵa túrli tulǵalardyń esimin eshqandaı resmı kelisimsiz berýi jıilep ketti, - dedi Májilis depýtaty Ashat Aımaǵambetov zań jobasyn tanystyra otyryp.

Halyq qalaýlysynyń aıtýynsha, jekemenshik mektepterdiń ataýyna qatysty keıbir faktiler qoǵamda rezonans týdyrdy.

- Osyǵan oraı, endi jekemenshik bilim berý uıymdary tulǵalardyń esimin bermes buryn, oblystyq onomastıkalyq komıssııanyń resmı maquldaýyn alýǵa mindettelmek. ıAǵnı, memlekettik bilim berý uıymdary sııaqty onomastıkalyq rásimderden ótedi, - deıdi A.Aımaǵambetov.

Aıta keteıik, búgin Qazaqstan Respýblıkasynyń keıbir zańnamalyq aktilerine mádenıet jáne bilim berý máseleleri boıynsha ózgerister men tolyqtyrýlar engizý týraly» zań jobasy Májilistiń birinshi oqylymynda qaralyp jatyr.

Eske sala ketsek, Memleket basshysy Qasym-Jomart Toqaev onomastıka belgili adamdardyń týysqandarynyń isi emes dep basa aıtqan edi. 

Sondaı-aq, Mádenıet jáne aqparat mınıstri Aıda Balaeva onomastıkada jershildik pen rýshyldyqqa jol berilmeıtinin málimdedi.