Jekemenshik lagerler maýsymnyń sońyna deıin lıtsenzııa alýy kerek – mınıstrlik
ASTANA. KAZINFORM – Qazaqstanda balalardy jatyn orynmen qamtıtyn jekemenshik jazǵy lagerler osy aıdyń sońyna deıin mindetti lıtsenzııadan ótýi qajet. Bul týraly Májiliste ótken brıfıngide Oqý-aǵartý vıtse-mınıstri Shynar Aqparova málimdedi.
Vıtse-mınıstrdiń aıtýynsha, qujattardy qaraýmen bilim berý salasyndaǵy sapany qamtamasyz etý jónindegi aýmaqtyq departamentter aınalysyp jatyr. Lager basshylyǵy lıtsenzııaǵa júginbes buryn sanıtarlyq qyzmetterdiń, TJM jáne ózge de quzyrly organdardyń ruqsat qaǵazyn alýy shart.
Alaıda Shynar Aqparova qujattary qaralyp jatqan lagerlerdiń ýaqytsha jumys isteı turýyna múmkindik bar ekenin naqtylady.
– Quqyqtyq aktiler týraly zańǵa sáıkes, olar ótinishti dál osy qosymsha zańnamalyq aktiler zańdy kúshine engennen keıin beredi. Búginde bul normatıvtik-quqyqtyq akt qabyldandy. Endi zańda olardyń qujattary qaralyp jatqan kezeńde óz qyzmetin 6 aıǵa deıin júzege asyra alatyny jazylǵan. Qazir bul salada qyzmet kórsetip jatqandar maýsymnyń sońyna deıin lıtsenzııa alýǵa tıis, – dep túsindirdi vıtse-mınıstr.
Sonymen qatar vedomstvo ókili bul talaptyń barlyq demalys oryndaryna qatysty emes ekenin aıtty.
– Bilim berý-saýyqtyrý qyzmetin kórsetetin qosymsha bilim berý uıymdaryna lıtsenzııalaý engizildi. Bizde basqa da, mysaly, mektep janyndaǵy lagerler bar, olar lıtsenzııalaýǵa jatpaıdy. Sondyqtan uıymdardyń barlyǵy birdeı lıtsenzııalanbaıdy, – dedi ol.
Mınıstrliktiń eskertýinshe, zańdy talapty oryndamaǵandar ákimshilik jaýapkershilikke tartylady.
– Bizdiń balalar saýyqtyrý ortalyqtarymyz kezeń-kezeńimen ashylyp jatyr. Eger maýsymnyń sońyna deıin olar lıtsenzııa almasa, bul úshin Ákimshilik quqyq buzýshylyq týraly kodekske sáıkes lıtsenzııasyz qyzmet kórsetkeni úshin ákimshilik jaýapkershilik qarastyrylǵan, – dedi Shynar Aqparova.
Eske sala keteıik, buǵan deıin lagerler qandaı talaptarǵa saı bolýy kerek ekenin jazǵan edik.
