Jekemenshiktegi medıtsınany damytý úshin sanıtarlyq jáne qurylys normalary qaıta qaralýda
ASTANA. QazAqparat - Jekemenshiktegi medıtsınany damytý úshin sanıtarlyq jáne qurylys normalary qaıta qaralyp jatar. Bul týraly QR Densaýlyq saqtaý vıtse-mınıstri Lázzat Aqtaeva málim etti, dep habarlaıdy QazAqparat.
«Sýbektiler jumysyna laýazymdy tulǵalar tarapynan tekserýlerdi azaıtý úshin tıisti jaǵdaı jasaý jolymen bızneske qysymdy tómendetý sharalary qabyldanyp jatyr. Barlyq jumystar medıtsınalyq kómek kórsetý júıesinde memlekettik emes sektor úlesiniń artýyna alyp kelýi qajet»,-dedi Aqtaeva.
Onyń sózine qaraǵanda, qazirgi kezde densaýlyq saqtaý salasynda qaıta retteý rásimi júrip jatyr jáne Densaýlyq saqtaý mınıstrliginiń baqylaý-tekserý qyzmetteri qaıta qaralýda.
Ózdiginen retteýdi damytý úshin jaǵdaı jasaý boıynsha jumys júrgizilýde, sonymen qatar tirkeý, bilimdi baǵalaý, klınıkalyq hattamalardy ázirleýge qatysty memlekettik qyzmetter aıqyndalýda. Qaıta retteý aıasynda bıznesti júrgizý úshin ahýaldy jaqsartý maqsatynda ákimshilik kedergilerdi joıý máselesi qaralýda. Osy oraıda bıznestiń medıtsınalyq qyzmetterdi kórsetýge belsendi qatysýyn yntalandyrý tetikteri pysyqtalyp jatyr. Bul rette sanıtarlyq erejeler qaıta qarastyrylýda, al «Atameken» UKP alańynda qurylys normalaryn jetildirý jumystary atqarylýda.
Vıtse-mınıstr Qazaqstan jekemenshiktegi medıtsınanyń damýy týraly keıbir málimetterdi jarııa etti.
Tegin medıtsınalyq kómektiń kepildi kóleminde 2016 jyly jekemenshiktegi medıtsınanyń úlesi 29,63 paıyzdy qurap, bul josparly deńgeıden joǵary boldy. Memlekettik-jekeshelik áriptestik baǵytynda 16 joba boıynsha sharttar bekitildi, sondaı-aq josparlaý men daıyndyq kezeńinde osyndaı 87 joba qamtylǵan.
Belgili bolǵandaı, 2016 jyly jeke aýrýhana uıymdarynyń sany 2015 jylmen salystyrǵanda 6,22 paıyzǵa artty. Ótken jyly jekemenshiktegi ambýlatorııalyq-emhanalyq uıymdar 558-ge jetti. 2014 jyly jekemenshik sektorda jumys isteıtin dárigerler 17,7 paıyz bolsa, 2016 jyly bul kórsetkish 22,7 paıyzdy qurady.
