Jekemenshikke berilgen Іle Alataýy tabıǵı ulttyq parki qalaı damıdy

ALMATY. QazAqparat – Almatyda Іle Alataýy tabıǵı ulttyq parkiniń biraz terrıtorııasy uzaq merzimge jekemenshikke paıdalanýǵa berildi. Osy oraıda, parktiń damý bolashaǵy qalaı bolatyny týraly press-týr barysynda aıtyldy, dep habarlaıdy QazAqparat tilshisi.

QR Ekologııa, geologııa jáne tabıǵı resýrstar mınıstrliginiń ókilderi jýrnalısterge parkti damytýdyń sheberlik josparyn tanystyrdy.

Ulttyq parkterde ekologııalyq týrızmdi damytý Qazaqstanda týrızm salasyn damytýdyń 2019-2025 jyldarǵa arnalǵan memlekettik baǵdarlamasy aıasynda júrgizilmek.

«AQSh, Andorra, Avstralııa sııaqty biraz eldiń tájirıbesin qarap shyqtyq. Bul sheberlik jospar halyqaralyq tájirıbege negizdelgen. Іle Alataýy parkin damytýǵa amerıkalyq modeldi negizge aldyq. Amerıkada ulttyq parkter ǵasyrlar boıy damyp keledi», - dedi mınıstrlikten.

Búginde Qazaqstanda Ulttyq parkterde týrıstik soqpaqtar, kempıngter, sanıtarlyq kabınalar, basqa da qajetti ınfraqurylymdar jetkiliksiz.

Sheberlik jospardy júzege asyrýda osy olqylyqtardyń ornyn toltyrý kózdelgen.

Bul jumystardyń atqarylýyn Ulttyq park basshylyǵy baqylaıtyn bolady. Salynatyn týrıstik nysandar Ulttyq park janyndaǵy Úılestirý keńesinde talqylanyp otyrady.

«Birinshi kezeńde Aıýsaı shatqalynda zamanaýı Vızıt ortalyǵy salynady. Bul jerde kelýshiler park jaıly qajetti aqparat alyp, demalys túrin tańdaıtyn bolady. Áleýmettik baǵyttaǵy nysandar, tamashalaý alańdary, kópirler jasalady», - dedi mınıstrlik ókilderi.

Investorǵa jalpy kólemi 35 ga bolatyn Úlken Almaty, Kishi Almaty, Kamen, Talǵar, Kókbastaý, Túrgen orman sharýashylyǵy terrıtorııasy paıdalanýǵa berilgen. Tenderlik komıssııanyń sheshimimen №1 lot jeńimpazy bolyp «KÝLTAÝ ı K» JShS tanyldy.

Bul aýmaqtarda kezeń-kezeńimen 10 zamanaýı Vızıt ortalyǵy salynyp, 155 shaqyrym jaıaý joldar jóndeledi.

Almatylyqtar úshin Іle Alataýy ulttyq parki terrıtorııasy árdaıym ashyq ári tegin bolady.