Jekemenshik IT-mektepterge maman daıarlaý úshin 3 myń vaýcher bólinedi - mınıstr

NUR-SULTAN. QazAqparat - Qazaqstandyq jekemenshik IT-mektepter maman daıarlaý úshin vaýcherler alýǵa ótinim bere alady. Ótinimdi https://astanahub.com/l/TechOrda saıty arqyly berýge bolady.

Bul týraly óziniń Facebook paraqshasynda QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın jazdy, dep habarlaıdy QazAqparat.

Mınıstrliń sózinshe, Tech Orda baǵdarlamasy boıynsha barlyǵy 600 myń teńgege deıin 3 myń vaýcher bólinedi.

«Ótken jyly biz osy baǵdarlamany pılottyq joba retinde ótkizip, ol kezde biz 13 jekemenshik IT-mektepti qarjylandyrdyq, 100 stýdent bilim aldy. Ár stýdentke vaýcher 600 myń teńgeni qurady. Bıyl biz bul jumysty jalǵastyramyz, biraq vaýcherler sanyn arttyrýdy josparlap otyrmyz.

IT-mamandardy daıarlaý máselesi Memleket basshysynyń baqylaýynda: Prezıdent 2025 jylǵa qaraı keminde 100 myń bilikti IT-mamandardy daıarlaý mindetin qoıǵan bolatyn. Olardyń 20 myńyn biz Astana Hub Tehnoparkimen birlese otyryp daıarlaıtyn bolamyz»,-deıdi mınıstr.

Onyń sózinshe, jas, kreatıvti, básekege qabiletti IT-talanttardy tárbıeleý-bul ýaqyt talaby. Álemde kúnde ózgeris bolyp jatyr, IT jáne tehnologııalar salasynda sapaǵa qoıylatyn talaptar ósýde.

Sondyqtan bizdiń elimiz úshin bul óte mańyzdy. Tech Orda baǵdarlamasy-bul qazaqstandyqtar úshin sapaly IT-bilimdi tegin alýdyń biregeı múmkindigi. Baǵdarlama bolashaqta kóptegen sapaly IT-jobalar beretinine senimdimin.

Jeke IT-mektepterden ótinimderdi qabyldaý 1 qyrkúıekte bastalady. Jeke IT-mektepterdi baǵdarlamaǵa qatysýǵa jáne belsendi ótinim berýge shaqyramyn!»,-dep jazdy Baǵdat Mýsın.