Jekemenshik emxanalar adam sanyn kóbeıtý úshin alaıaqtyq jasaıdy - Erik Baıjúnisov
ASTANA. QazAqparat - Búginde kepildendirilgen tegin medıtsınalyq qyzmettiń qarjysy adam sanyna qaraı taratylady. Al keıbir jekemenshik klınıkalar ol aqshany kóptep alý maqsatynda basqa mekemelerdi jamandap, patsıentterdi ózderine jazdyrady. Adamdardy aldap jazdyrý oqıǵalary da bar, dep xabarlaıdy QazAqparat tilshisi.
"Qazirgi kezde bir-eki oblystan bizge xattar túsip jatyr. Negizi, naryqtyq ekonomıka zańdary boıynsha medıtsınalyq qyzmetker árbir úıge baryp, óz mekemesine jarnama jasaýy tıis. Sóıtip, adam tartýy kerek qoı. Alaıda bizdiń keıbir jeke menshik klınıkalarymyz ózderi barmaı, bireýdi jiberedi. Olar tirkeý máselesin túsindirmeıdi, basqa áńgimelerdi aıtady da, qujattaryn alyp, ózderine jazdyryp alady. Bireýdiń ornyna qol qoıý oqıǵalary da bar. Qazirgi kezde biz tekseris júrgizip jatyrmyz. Negizi, ondaı áreketter alaıaqtyq bolyp sanalady", - deıdi Áleýmettik medıtsınalyq saqtandyrý qory tóraǵasynyń orynbasary Erik Baıjúnisov.
Onyń aıtýynsha, ondaıda jekemenshik klınıkamen kelisimshartty buza salý jeńil. Biraq ondaı áreketterge klınıka ujymy emes, bir adam ǵana jaýapty bolýy múmkin. Sondyqtan onyń áreketi úshin klınıkaǵa memleket qarjysyn bermeı qoıý durys emes. "Qazirgi kezde biz emxanaǵa tirkelýdiń jańa joldaryn qarastyryp jatyrmyz. Negizi, emxanaǵa tirkelýdiń ádis-tásilderi kóp bolýy kerek qoı. Ókinishke qaraı, bizdiń densaýlyq salasynda ozyq aqparattyq texnologııalar áli joq. Másele sonda bolyp tur. Adam jeke qujatyn kórsetýi kerek, tsıfrlyq qoltańbasy bolýy shart. Sol sııaqty kóptegen sharttar bar. Degenmen, qazir bizdiń IT-texnologtarymyz jumys istep jatyr. Sondaı baǵdarlama daıyndalǵanda xalyqqa yńǵaıly bolady. Ázirshe, tirkelýdiń eki joly bar. Birinshisi, egov portaly arqyly, ol ashyldy, jumys istep jatyr. Ekinshisi, xalyqqa qyzmet kórsetý ortalyqtary arqyly, biz osy qyzmetti iske qosýdy josparlap otyrmyz", - dep atap kórsetti E.Baıjúnisov.
