Jekemenshik bilim berý mekemeleri Qazaqstanda «Jekemenshik bilim berý týraly» jańa zań qabyldanýy tıis dep esepteıdi

Búgin ótken baspasóz máslıhatynda Jekemenshik bilim berý uıymdarynyń respýblıkalyq qaýymdastyǵynyń tóraǵasy Talǵat Aqýov atap kórsetkendeı, búgingi kúni Qazaqstanda jekemenshik bilim berý salasynda, 115 mektep, 369 koledj ben lıtseı, 367 balabaqsha men 70 JOO jumys isteıdi.

Jekemenshik JOO-lar bilim nárin sýsyndap jatqan stýdentterdiń 10-12 paıyzyn qamtyp otyr. «Halyqaralyq statıstıkaǵa súıensek, álemniń ozyq elderindegi ekonomıka, zań, saıasat jáne basqa da salalardyń úzdik mamandary jekemenshik bilim berý mekemeleriniń túlekteri bolyp tabylady», - deıdi ol.

Al Jekemenshik bilim berý uıymdarynyń respýblıkalyq qaýymdastyǵynyń dırektory Roza Sadyqovanyń aıtýynsha, osydan 20 jyl buryn Qazaqstan egemendigin endi ǵana alyp, aıaǵynan tura bastaǵan kezde bilim berý mekemeleri, sonyń ishinde balabaqshalar birinen son biri jabyla bastady. «Sol ýaqytta eldegi qıyn jaǵdaıǵa qaramastan optımıst adamdar jekemenshik bilim berý mekemelerin ashty. Búgin Táýelsizdiktiń 20 jyldyǵy qarsańynda qorytyndy jasap, jekemenshik bilim berý Qazaqstanda bar ekendigin aıtqymyz kelip otyr», - deıdi ol.

R.Sadyqovanyń sózine qaraǵandaı, búgin jekemenshik bilim berý mekemeleri Úkimet pen Bilim mınıstrligi tarapynan qoldaý taýyp otyr. Degenmen túıini tarqamaı otyrǵan problemalar da joq emes. Qaýymdastyq ókilderiniń pikirinshe, Qazaqstanda «Jekemenshik bilim berý týraly» jeke zań qabyldanýy tıis. Olar zańnyń jobasyn 2008 jyly ázirlegen de eken.

«Biraq zań jobasyn qoldaýshylardan góri, synaýshylar kóp boldy. Ol Bilim mınıstrligi, Parlament depýtattary tarapynan qoldaý taba almady. Eki jyl ótkennen keıin ǵana dıalog paıda bola bastady. Nátıjesinde, biz ázirlegen zań jobasynyń 30 paıyzǵa jýyǵy «Bilim berý týraly» QR Zańyna engizildi», - deıdi T.Aqýov.

Aıta keteıik, jekemenshik bilim beretin 250 mekemeni óz qanatynyń astyna jınap otyrǵan Qaýymdastyq, ol uıymdarǵa konsýltatıvtik turǵydan ǵana bolmasa, olardaǵy bilim berý sapasynyń standarttarǵa saı bolýyn qadaǵalap, retteý quzyryna ıe emes. Qazaq-Qytaı kolledjiniń dırektory Talǵat Mamyrulynyń sózinshe, shet elderde Jekemenshik bilim berý uıymdarynyń qaýymdastyqtaryna ondaı quzyr zańmen berilgen.

QR Bilim jáne ǵylym mınıstrliginiń memlekettik attestatsııasy kezinde bilim berý úrdisi standarttarǵa saı bolmaı shyqqan birqatar jekemenshik JOO-lardyń oblystardaǵy fılıaldary jabylatyny belgili. Al byltyr Soltústik Qazaqstan oblysyndaǵy Qazaqstan-Reseı ýnıversıteti jumysyn lıtsenzııasyz júzege asyryp kelgeni anyqtaldy. Aqyrynda aqyly negizde bilim alǵan stýdentterdiń dıplomdary jaramsyz bolyp qaldy.

Qaýymdastyq ókilderiniń sózinen málim bolǵandaı, olar tek «adal nıetti» jekemenshik bilim berý mekemelerimen ǵana jumys isteıdi. Al altyn ýaqyttaryn joǵaltyp, qyrýar aqshalaryn jelge shashqan bolyp shyqqan stýdentter men olardyń ata-analarynyń quqyqtaryn kim qorǵaıdy? Sol úshin de jekemenshik bilim berý salasyn zań júzinde rettep, qadaǵalap otyratyn jeke zań kerek.

Qaýymdastyq, atalmysh máselelerdi ústimizdegi 21 sáýirde Astanadaǵy Táýelsizdik saraıynda ótetin «Qazaqstan Respýblıkasyndaǵy jekemenshik bilim berý. Damý tendentsııasy men bolashaǵy» taqyrybynda ótetin 7-shi halyqaralyq ǵylymı-praktıkalyq konferentsııada kótermek.

Qazaqstandaǵy jekemenshik JOO-dyń rektorlary, mektepter men kolledjderdiń, mektepke deıingi mekemelerdiń dırektorlary, Anglııa, Kıpr, Reseı, Qyrǵyzstan elderiniń mamandary men Germanııa, Polsha, Qytaı elderiniń Qazaqstandaǵy konsýldyqtarynyń ókilderi qatysatyn sharaǵa, sondaı-aq Elbasy N.Nazarbaev, QR Úkimetiniń basshysy K.Másimov, Bilim jáne ǵylym mınıstri B.Jumaǵulov pen QR Parlamentiniń qos palata depýtattary shaqyrylyp otyr.