Jekemenshik balabaqshalarǵa memlekettik tapsyrys usynylatyn bolady - J. Túımebaev
aýryzdyń 29-y. QazAqparat /Qanat Mámetqazyuly/ -Búgingi kúni elimizde mektepke deıingi daıyndyqpen qamtý 38,7 paıyzdy qurasa, 2020 jylǵa qaraı respýblıka boıynsha balabaqshamen qamtý tolyq, 100 paıyzdyq deńgeıdi quraıdy.
Bul rette jekemenshik balabaqshalarǵa memlekettik tapsyrys usynylatyn bolady. Búgin QR Parlamenti Májilisinde ótken Úkimet saǵatynda Bilim jáne ǵylym mınıstri Janseıit Túımebaev osylaı málim etti, dep habarlaıdy QazAqparat.
«Memlekettik balabaqshalardyń balamasy retinde - iri kompanııalar, uıymdar, kásiporyndar janyndaǵy balabaqshalar, jekemenshik balabaqshalar men shaǵyn ortalyqtar uıymdastyrylady. Bul rette balabaqshalar men shaǵyn ortalyqtar ashý, olardy rásimdeý sharalary birshama jeńildetiletin bolady. Elbasy tapsyrmasyna sáıkes, osy máselelerdi sheshýdiń tetikterin qarastyratyn «Balapan» arnaıy baǵdarlamasy ázirlenip otyr, baǵdarlama osy aptada talqyǵa usynylady», dedi J. Túımebaev.
Mınıstrdiń aıtýynsha, qazirgi tańda balabaqshamen qamtamasyz etý jobasyna sáıkes naqty josparlar, kesteler men tetikter qalyptasqan. Bul rette ony júzege asyrý memlekettik uıymdar, mekemeler jáne jekemenshiktik sektor arqyly órbıdi. Vedomstvo basshysynyń sózine qaraǵanda, qazirgi tańda mektepke deıingi mekemelerdiń jekemenshik sektory úshin lıtsenzııa alý úrdisi jeńildetilgen, sanıtarlyq normalar men erejeler qaıta qarastyrylǵan. «Budan bólek jekemenshik balabaqshalar men shaǵyn ortalyqtar úshin memlekettik tapsyrys jasalatyn bolady», dedi J. Túımebaev.
