Jekemenshik balabaqshalardyń jumysyna qatysty shaǵymdar túsip jatyr - mınıstrlik

NUR-SULTAN. QazAqparat - Oqý-aǵartý mınıstrligine ata-analardan tárbıeshilerdiń balalarǵa qol jumsaýyna, densaýlyǵyna zııan keltirýge, sondaı-aq balabaqshada balalarǵa jasalǵan sapasyz jaǵdaıǵa jáne keıbir jekemenshik balabaqshalardyń josyqsyz jumysyna qatysty shaǵymdar áli túsip jatyr.

Ata-analar balabaqshalardyń qyzmetin eshkim rettemeıtinin aıtyp, shara qoldanýdy talap etip jatyr, dep habarlaıdy QazAqparat QR Oqý-aǵartý mınıstrliginiń baspasóz qyzmetine silteme jasap.

Qostanaıda balabaqsha tárbıeshisi úsh jasar búldirshindi qatty tartyp, saldarynan onyń súıegi synyp ketken. Tárbıeshi jumystan bosatyldy, al balabaqsha dırektory ákimshilik jaýapqa tartyldy.

Oqıǵa Oral qalasyndaǵy jekemenshik balabaqshada da bolǵan, onda tárbıeshi kishkentaı qyzdy soqqyǵa jyqqan.

Ata-analardan Oraldaǵy taǵy bir jekemenshik balabaqshanyń tárbıeshisine qatysty shaǵym tústi. Balalar ata-analaryna tárbıeshiniń urǵanyn aıtyp shaǵymdanǵan. Tárbıelenýshilerdiń aıtýynsha, olardy birneshe aı boıy uryp-soǵyp kelgen. Balalar tárbıeshisinen qoryqqandyqtan osy ýaqytqa deıin ata-analaryna eshteńe aıtpaı kelgen. Onyń balalardy qatań jazamen qorqytqany belgili boldy. Balabaqsha qyzmetkerine qatysty qylmystyq is qozǵaldy.

Bilim berý salasyndaǵy sapany qamtamasyz etý jónindegi aýmaqtyq basqarmalarǵa balabaqshadaǵy búldirshinderdiń túrli jaraqattary týraly aqparat kún saıyn túsip jatyr. Bul pedagogterdiń balalarǵa durys qaramaıtynyn kórsetedi.

Qyzylordada jekemenshik balabaqshada búldirshinderdi qaraýsyz qaldyrý faktileri tirkeldi. Dalaǵa óz betimen shyǵyp ketken balalardy qalanyń turǵyndary taýyp alǵan. Dál osyndaı jaǵdaı elordalyq balabaqshada da bolǵan. Tárbıeshiler tártiptik jaýapqa tartyldy.

«Quqyq buzýshylyqtardyń sanyn azaıtý jáne balabaqshalardyń jumysyn retke keltirý úshin biz lıtsenzııa berýdi engizýdi qolǵa alyp otyrmyz. Bul balalardyń balabaqshadaǵy qaýipsizdigin jaqsartady. Eger balabaqsha talapqa saı bolsa, onda qysqa ýaqyt ishinde tsıfrly lıtsenzııa alady. Al eger saı bolmasa, kemshilikterdi joıýǵa ýaqyt beriledi. Lıtsenzııa berý talaptary qarapaıym. Odan qorqýdyń qajeti joq. Jumys istep turǵan balabaqshalardyń basym kópshiligi lıtsenzııany ońaı ala alady. Biz balalardy sapaly mektepke deıingi tárbıe men oqytýmen qamtamasyz etýge múddelimiz», - dedi Oqý-aǵartý mınıstrligi Bilim jáne ǵylym salasyndaǵy sapany qamtamasyz etý komıtetiniń tóraǵasy Gúlzat Kóbenova.