Jekemenshik balabaqsha tárbıeshileri biliktilikti arttyrý kýrstarymen qamtylady

NUR-SULTAN. QazAqparat – Jekemenshik balabaqshalarda jumys istep jatqan tárbıeshiler memlekettiń biliktilikti arttyrý kýrstarymen qamtylady. Bul týraly pedagogterdiń respýblıkalyq tamyz konferentsııasynda Oqý-aǵartý mınıstri Ashat Aımaǵambetov aıtty, dep habarlaıdy QazAqparat tilshisi.

«Balabaqshalarda kadrlar daıarlyǵynyń jetkiliksiz bolýyna biliktilikti arttyrý kýrstarynyń azdyǵy sebep bolyp tur. Kelesi jyly biliktilik kýrstaryn úsh ese kóbeıtemiz. Atap aıtqanda, jekemenshik balabaqshalar memlekettik uıymdar sııaqty bizdiń balalardy tárbıelep jatyr. Jekemenshik balabaqshalardy kýrstarmen qamtymaý durys emes. Sondyqtan aldaǵy jyldan bastap jekemenshik balabaqshalarda jumys istep jatqan tárbıeshilerdi de memlekettiń biliktilikti arttyrý kýrstarymen qamtý máselesin sheshemiz», - dedi A.Aımaǵambetov.

Osy oraıda mınıstr bilim berý uıymdaryndaǵy sapany kóterý atalǵan máselege tikeleı baılanysty ekenin aıtty.

«Memlekettik tapsyrysty biz beremiz. Bir jylda memleket 505 mlrd teńgeni balalardy balabaqshamen qamtý úshin jumsap otyr. Osy memlekettik tapsyrysty bergende birneshe jaǵdaıdy ózgertýimiz kerek», - dedi vedomsıvo basshysy.

Osy oraıda ol mindetti túrde balabaqshada beıne kameralardyń bolýy boıynsha jáne balalarǵa qolaıly jaǵdaı jasaýǵa qatysty arnaıy talaptar bekitilgenin aıtty.

Budan buryn habarlanǵandaı, Oqý-aǵartý mınıstri Ashat Aımaǵambetov balabaqshalarda pedagogterdiń júktemesin azaıtý jospary týraly aıtty.