Jekemenshik balabaqsha ıelerine lıtsenzııalaýdan qorqýdyń qajeti joq – Aımaǵambetov

NUR-SULTAN. QazAqparat – Jekemenshik balbaqshalarǵa lıtsenzııalaý talaptary joǵary bolmaıdy. Bul týraly QR Oqý-aǵartý mınıstri Ashat Aımaǵambetov aıtty, dep habarlaıdy QazAqparat tilshisi.

«Lıtsenzııa berý – mektepke deıingi bilim sapasyn qamtamasyz etýdiń mańyzdy quraly bolǵanymen, jalǵyz tetigi emes. Biz pedagogterdiń biliktiligin arttyrý, jan basyna qarjylandyrýdy damytý, baǵdarlamalardy jetildirý jáne basqa da jumystardy júrgizip jatyrmyz. Qazirgi ýaqytta elimizde mektep, kolledj, joǵary oqý oryndary deńgeıi boıynsha lıtsenzııa berý bar. Mysaly, sońǵy úsh jylda jekemenshik mektepterdiń sany birneshe ese ósti. Ol neni bildiredi? Ol lıtsenzııa berýdiń jekemenshik mektepter ashý úshin eshqandaı da kedergisi joq ekenin jáne talapty oryndaýǵa bolatynyn bildiredi. Sondyqtan biz dál osy tártipti endi balabaqshalarǵa qaıtadan engizip jatyrmyz. Balabaqshalardyń quryltaıshylary men ıelerine dúrligip, qorqýdyń qajeti joq. Sebebi elimizdegi barlyq balabaqsha bir kúnde nemese bir aıda lıtsenzııa berý tártibinen ótedi dep aıtyp jatqanymyz joq. Birinshi kezekte jańadan ashylyp jatqan jekemenshik, memlekettik balabaqshalar lıtsenzııa alady. Kelesi kezeńde táýekeli kóp uıymdarǵa lıtsenzııa berý jumysy júrgiziledi», - dedi Ashat Aımaǵambetov.

Mınıstrdiń atap ótýinshe, balabaqshalar birlestikteriniń basym kópshiligi lıtsenzııa berý júıesin qaıta engizýdi qoldap otyr. Sebebi sapasyz balabaqshalar men balalardy uryp-soǵý faktilerin eshkim joqqa shyǵara almaıdy. Balabaqsha quryltaıshylary balalardyń múddesin birinshi orynǵa qoıyp, barynsha ashyq, ádil jáne barlyǵyna birdeı múmkindik bolǵanyn durys dep sanaıdy.

«Lıtsenzııa talaptary joǵary bolmaıdy. Eger balabaqsha osy mınımaldy talaptarǵa sáıkes keletin bolsa, onda qıyndyqsyz, óte qysqa merzimde, elektrondy formatta lıtsenzııa alady. Sondyqtan bul aıtarlyqtaı úlken másele týǵyzbaıdy. Bizdiń múddemiz – balalardy sapaly balabaqshamen qamtý», - dedi Oqý-aǵartý mınıstri.

Eske salaıyq, keshe atalǵan mınıstrlik balabaqshalarǵa qatysty ata-analardan kelip túsetin shyǵamdar týraly habarlaǵan bolatyn. Olardyń arasynda tárbıeshiniń balany uryp-soǵý, daýys kóterý, tipti tunshyqtyrý jaǵdaılary bar.