Jekelegen taýarlar men qyzmet túrlerine qosymsha qun salyǵy qaıta salynýy múmkin

ASTANA. QazAqparat – Buryn qosymsha qun salyǵynan bosatylǵan taýarlar, jumystar men qyzmetterge qosymsha qun salyǵyn qaıta salýdy qarastyrý qajet. Mundaı usynys Ulttyq ekonomıka mınıstrligi jarııalaǵan jańa Salyq saıasatynyń konsýltatıvtik qujatynda aıtylǵan, dep habarlaıdy QazAqparat tilshisi.

«Salystyrmaly taldaý kórsetkendeı, qazirgi ýaqytta Qazaqstanda qoldanylatyn 12% mólsherindegi qosymsha qun salyǵynyń (QQS) biryńǵaı stavkasy álemdegi eń tómen mólsherlerdiń biri sanalady. Táýelsizdiktiń alǵashqy jyldarynda Qazaqstanda QQS mólsherlemesi 28 paıyzdy qurady. Sonymen birge jyldar ótken saıyn mólsherleme birtindep tómendedi. Mundaı tómendetýdiń maqsaty taýarlardyń, jumystardyń, qyzmetterdiń kóleńkeli aınalymyn azaıtý arqyly salyq jınaý deńgeıin arttyrý boldy», - dep Ulttyq ekonomıka mınıstrligi jańa Salyq kodeksiniń konsýltatıvtik qujatynda derekter keltirgen.

Alaıda vedomstvo qosymsha qun salyǵynyń mólsherin kótermeı, tek buryn osy salyqtan bosatylǵan taýarlar tizimin qaıta qaraý qajet ekenin atap ótken.

«Joǵaryda aıtylǵandardy eskere otyryp, qoldanystaǵy QQS mólsherlemesin 12% kóleminde saqtaý jáne QQS tómendetilgen mólsherlemesiniń ornyna eseptelgen QQS tómendetý quqyǵyn engizý usynylady. Sonymen qatar buryn bosatylǵan taýarlarǵa, jumystarǵa, qyzmetterge (medıtsına, bilim berý jáne taǵy da basqa) qosymsha qun salyǵyn salýdy qarastyrý mańyzdy», - dep usynys jazylǵan konsýltatıvtik qujatta.