Jekelegen naryqtaǵy baǵa shekteýlerin alyp tastaý is-qımyl jospary qabyldanbaq
ASTANA. KAZINFORM — Elimizde jekelegen naryqtaǵy baǵa shekteýlerin alyp tastaý boıynsha is-qımyl josparyn qabyldaý josparlanǵan. Bul týraly Ulttyq ekonomıka mınıstrliginen málim etti.
— Ekonomıkany yryqtandyrý aıasynda memlekettik sektor úlesin azaıtý, birqatar salany demonopolızatsııalaý, memlekettik qoldaý sharalaryna teń qoljetimdilikti qamtamasyz etý jáne taǵy basqalary boıynsha sharalar iske asyrylyp jatyr. Atap aıtqanda, memlekettiń kásipkerlik qyzmetke qatysýynyń zańnamalyq negizderin 5-ten 4-ke deıin qysqartý boıynsha (Kásipkerlik kodekstiń 192-babynyń 5-tarmaqshasyn alyp tastaý esebinen) túzetýler qabyldandy. Kvazımemlekettik sektordy qurýǵa 2026 jylǵy 31 jeltoqsanǵa deıin moratorıı engizildi jáne múlikti túgendeý, pasporttaý jáne qaıta baǵalaý boıynsha júrgizilgen jumystardyń qorytyndysy boıynsha Memlekettik tizilim ózektilendirildi. Memlekettik kompanııalarda korporatıvtik basqarýdy arttyrý aıasynda dırektorlar keńesteriniń táýelsiz múshelerin konkýrstyq irikteý, sondaı-aq táýelsiz dırektorlar saılanatyn arnaıy tizilim engizildi, — dedi mınıstrlikten agenttiktiń resmı saýalyna oraı.
Vedomstvo málimetinshe, memlekettik retteýdi ózgertýge, básekelestik tarıfterdi engizýge jáne basqalaryna baılanysty birqatar shara 2027-2029 jyldarǵa josparlanǵan.
— Joǵaryda atalǵan is-sharalardyń oryndalý barysy Premer-mınıstriniń tóraǵalyǵymen ótken Ekonomıkany demonopolızatsııalaý jónindegi komıssııa otyrysynda qaraldy. Qaraý qorytyndysy boıynsha zańnamalyq, ekonomıkalyq jáne tehnologııalyq baǵyttardy qamtıtyn keshendi sharalar ázirlendi. Atap aıtqanda, kvazımemlekettik sektordaǵy holdıngishilik kooperatsııany kezeń-kezeńimen qysqartý, tarıfterdi saralaý bóliginde Tarıfterdi qalyptastyrý qaǵıdalaryn ózgertý arqyly normatıvtik bazany úılestirý kózdeledi. Bul rette yntalandyrýshy tarıftik retteýdi engizý jekeshelendirýge jatatyn kásiporyndarǵa qatysty basym tártippen usynylady. Sonymen qatar, Jekelegen naryqtardaǵy baǵa shekteýlerin alyp tastaý boıynsha is-qımyl josparyn qabyldaı otyryp, baǵa shekteýlerin anyqtaýdyń jáne olardyń saldaryn baǵalaýdyń biryńǵaı ádisnamasyn engizý usynylady, — dedi Ulttyq ekonomıka mınıstrligi.
Premer-mınıstr Oljas Bektenov Ekonomıkany monopolııasyzdandyrý jónindegi komıssııanyń otyrysyn ótkizip, onda memlekettik organdarǵa ekonomıkany yryqtandyrý baǵytynda birqatar tapsyrma bergen edi.
