Jekelegen qylmystyq jolmen alynǵan múlikter raqymshylyq aıasynda zańdastyrýǵa jatpaıdy - A. Teńgebaev

ASTANA. QazAqparat - Búgin Májiliste «Qazaqstan Respýblıkasynyń azamattaryna, oralmandarǵa jáne Qazaqstan Respýblıkasynda turýǵa yqtııarhaty bar tulǵalarǵa olardyń múlikti jarııa etýine baılanysty raqymshylyq jasaý týraly» zań jobasynyń tanystyrylymy bolyp ótti.

Eske salaıyq, qujat Memleket basshysy N. Nazarbaevtyń tapsyrmasy boıynsha ázirlengen.

Zań jobasyna sáıkes, jarııa etý nysandaryna baǵaly qaǵazdar, zańdy tulǵanyń jarǵylyq kapıtalyndaǵy qatysý úlesteri, sonymen qatar, Qazaqstannan tysqary aýmaqtardaǵy jyljymaıtyn múlikter jatady.

«Jekelegen qylmystar nátıjesinde alynǵan múlikter jarııa etýge (zańdastyrýǵa) jatpaıdy. Máselen, buǵan tulǵaǵa qatysty oryn alǵan qylmystar, adamnyń konstıtýtsııalyq jáne basqa da quqyqtary men bostandyqtaryn buza otyryp alynǵan múlikter, konstıtýtsııalyq qurylym men memlekettik qaýipsizdikke qarsy qylmystyq jolmen alynǵan kirister, sondaı-aq, sybaılas jemqorlyq jáne basqa da quqyq buzýshylyq pen memlekettik qyzmet múddesine qaıshy qylmystar jasaý boıynsha alynǵan múlikter jatady", - dep atap ótti zań jobasyn tanystyrǵan Qarjy vıtse-mınıstri Ardaq Teńgebaev.

Onyń sózine qaraǵanda, Elbasy bastamasymen júzege asatyn múliktik raqymshylyq elimizdiń ekonomıkalyq aınalymyna qosymsha qarajat pen múlikterdi tartý maqsatyn kózdep otyr. Bul rette zańdastyrylǵan qarajat pen múlikter salyq salý maqsattary úshin tabys retinde qarastyrylmaıdy, soǵan sáıkes olarǵa tabys salyǵy da salynbaıtyn bolady. Budan bólek, jarııa etilgen múlik sýbektileri qylmystyq jáne ákimshilik jaýapkershilikten bosatylady.

Toqtala ketetin jaıt, buǵan deıin de belgili bolǵanyndaı, múlikterdi jarııa etý merzimi 2014 jylǵy 1 qyrkúıekten 2015 jylǵy 31 jeltoqsan aralyǵynda aıqyndalǵan bolatyn.