Jekelegen qazaqstandyq jaýyngerlerdi lańkestik aktilerdi uıymdastyrý úshin daıyndaǵan «Halıfat soldattary» uıymynyń lıderi óltirildi
ASTANA. 19 qazan. QazAqparat - Pákistannyń Soltústik Vazırıstan provıntsııasynda «Halıfat soldattary» lańkestik uıymynyń kóshbasshysy Moezeddın Garsalaýı óltirildi, dep habarlady SITE Intelligence Group-ke silteme jasaǵan «Ekspress K» gazeti («Soldat neýdachı», № 195 (17553), 19.10.2012 jyl).
Onyń ólimi týraly aqparat ushqyshsyz basqarylatyn amerıkandyq áýe quraldary Soltústik Vazırıstandy oq astyna alyp, 23 adam qaza tapqannan keıingi eki kúnnen soń shyqty.
Týnıs týmasy Garsalaýı sondaı-aq «Al-Kaıraýanı» uıymynyń múshesi bolǵan. Ol aýǵan-pákistan shekarasynda jarylystardy uıymdastyryp, sodyrlardy úıretti. Budan basqa, Garsalaýı «týlýzalyq mergen» Mohammed Merdiń tálimgeri boldy. Ol sondaı-aq keıbir qazaqstandyq jaýyngerlerdi keıin olardy lańkestik aktilerdi uıymdastyrýǵa elderine jiberý úshin daıyndady. «Halıfat soldattary» Qazaqstandaǵy birqatar lańkestik aktiler úshin jaýapkershilikti óz moıyndaryna aldy. Bul uıymdy ótken jyly qazaqstandyq Rınat Habıdolla, Orynbasar Munatov pen Damır Zinalıevter Qazaqstan aýmaǵynda jıhad otyn tutatý maqsatynda qurdy.
2007 jyldyń maýsymynda Shveıtsarııa soty Garsalaýıdi jáne onyń zaıyby Malıka el Arýdty lańkestikti nasıhattaıtyn ınternet-saıtty qurǵany úshin sottady. Túrmeden shyqqan soń olar Belgııaǵa kóship, onda Aýǵanstanǵa sodyrlardy jınaqtaýdy degen kúdik taǵyldy. Keıinirek Garsalaýı Eýropadan ketip, «Ál-Kaıda» men 2008 jyly joıylǵan belgııalyq lańkestik jelisi arasynda baılanys kópiri boldy.
