Jekelegen eskertýler bolmasa saılaý zań aıasynda ótti - Saılaýdy qadaǵalaý jónindegi respýblıkalyq komıssııa

ASTANA. 10 tamyz. QazAqparat - Jekelegen eskertýler bolmasa, aýyl ákimin saılaý naýqanynda saılaý zańnamasyn buzýshylyq anyqtalmady. Bul týraly búgin brıfıngte Qazaqstannyń aýdandyq mańyzy bar qalalar, aýyldyq okrýgter, aýyldyq okrýgterdiń quramyna kirmeıtin kentter men aýyldar ákimderiniń saılaýyna baılanysty qurylǵan Saılaýdy qadaǵalaý jónindegi respýblıkalyq qoǵamdyq komısssııanyń tóraǵasy Ómirzaq Ozǵanbaev málim etti.

«Elimizde ótken aýyl ákimderiniń saılaýyna oraı qurylǵan respýblıkalyq qoǵamdyq komıssııanyń negizgi mindeti saılaý zańnamasynyń júzege asýyn qadaǵalaý, ádil, ashyq, taza saılaý ótkizýge járdemdesý, sonymen birge qoǵamnyń túrli saıası kúshteri arasyndaǵy zamanaýı básekelestikti damytý, azamattardyń jalpylama saıası mádenıetin arttyrý bolyp edi. Bul mindetti biz oryndaı aldyq dep sanaımyn. Komıssııa músheleri baıqaýshy retinde óńirlerdegi saılaýǵa, daýys berý barysyna qatysty», - deıdi Ó. Ozǵanbaev.

Onyń aıtýynsha, jalpy respýblıka jurtshylyǵy ákimder saılaýyna oń kózqarastar tanytyp, saılaý týraly jaǵymdy pikirler aıtqan, saıası úderistiń daýys berý barysy joǵary deńgeıde uıymdastyrylǵany atalyp ótilgen. «Bizdiń málimetter boıynsha aýyl ákimderiniń saılaý naýqany barysynda saılaý zańnamasyn buzýshylyq anyqtalmady. Sonymen bir mezgilde, saılaý úderisi barysynda, onyń ishinde negizinen saılaý komıssııalaryna jáne bizge jekelegen eskertýler de kelip tústi. Bul birinshiden, ákim laýazymyna kandıdattar usynýǵa qatysty bolyp otyr. Máselen, kandıdattar usyný men ákimderdiń jergilikti jurtshylyqpen konsýltatsııalar júrgizýine oraı, jergilikti halyq keıbir kandıdat bolyp tabylatyn aýyl ákimderiniń kásibı qyzmetine kóńil tolmaýshylyq tanytty. Onyń ishinde ondaı kandıdattardyń óz mindetterin sapasyz oryndaǵany aıtyldy. Aýyldaǵy problemalardyń, sonyń ishinde aýyzsýmen qamtamasyz etý, qoǵamdyq ómir máseleleriniń sheshilmeı kelgendigi jetkizildi», dep atap ótti komıssııa tóraǵasy Ó. Ozǵanbaev.

Eske salsaq, QR Prezıdentiniń Jarlyǵyna sáıkes, aǵymdaǵy jyldyń 5-9 tamyz aralyǵynda elimizdiń 14 oblysynda aýdandyq mańyzy bar qalalar, aýyldyq okrýgter, aýyldyq okrýgterdiń quramyna kirmeıtin kentter men aýyldardyń 2457 ákiminiń saılaýy ótip, barlyǵy 2454 ákim saılandy. Úsh aýyldyq okrýgte jeńimpazdar anyqtalǵan joq. Sebebi tańdaýshylardyń daýystary teń bólindi. Atalǵan ákimshilik aýmaqtyq qurylymda tamyzdyń 28-inde qaıta saılaý ótkiziledi.