Jekelegen basshylar órt qaýipsizdigi talaptaryn elegisi joq – Tótenshe jaǵdaılar mınıstri
ASTANA. 21 mamyr. QazAqparat - 2011 jyly elimizde oryn alǵan órt oqıǵalary 2010 jylmen salystyrǵanda 20 paıyzǵa tómendedi.
Degenmen, Tótenshe jaǵdaılar mınıstri Vladımır Bojko búgin Parlamenti Májilisinde ótken Úkimet saǵatynda jekelegen basshylardyń órt qaýipsizdigi máselelerine mensinbeı qaraıtyndyǵyn synǵa aldy.
Mınıstrdiń aıtýynsha, sońǵy ýaqytta elimizde órt qaýipsizdigi salasyndaǵy aldyn alý boıynsha maqsatty jumystar júrgizilip jatyr. Máselen, esepti kezeńde 98 242 nysannyń órtke qarsy jaı-kúıi tekserilgen. Nátıjesinde erejeni buzǵany úshin 9589 adam ákimshilik jaýapkershilikke tartylypty. 30 460 laýazymdy tulǵaǵa jalpy somasy 308 mln.-nan astam teńgege aıyppul salyndy.
«Jalpy mamandandyrylǵan aýdanaralyq ekonomıkalyq sottarǵa órtke qaýipti jaǵdaılardaǵy nysandardy, agregattar men ǵımarattardy salýdy toqtatý jóninde 2506 talap-aryz berildi. Jalpy sotqa shaǵymdaný bul - eń sońǵy shara. Soǵan deıin biz tıisti túsindirý jumystaryn júrgizýdi qolǵa alamyz. Alaıda, jekelegen basshylar buǵan barynsha mán bermeıdi, órt qaýipsizdigi erejeleri saqtalmasa adam shyǵynyn qosa alǵanda qandaı qasiretter oryn alatynyn túsingisi kelmeıtinder barshylyq», - deıdi V. Bojko.
Mınıstrdiń málimetterine qaraǵanda, byltyrǵy jyly óndiristik jáne turmystyq órtter 20 paıyzǵa tómendedi. Sonyń arqasynda órtten bolatyn jaraqattanǵandar sany - 17, qaza bolǵandar sany - 8, materıaldyq zala 6 paıyzǵa tómendedi.
