Jekege ótken Tilendıev atyndaǵy mýzykalyq mekteptiń ujymy ákimge bardy
TALDYQORǴAN. QazAqparat - Almaty oblysynda Nurǵısa Tilendıev atyndaǵy saz mektebiniń ustazdary mekemeniń jekeniń qolyna ótip ketkenin bilmeı qalǵanyn aıtyp, narazylyq bildirýde, dep habarlaıdy QazAqparat tilshisi.
Sózderinshe, birde-bir adam olarǵa memlekettik mekemeniń jekege ótetini jaıly habarlamaǵan. Al búginde 400-den asa balany ónerge baýlyp otyrǵan ustazdar mýzyka mektebi jekege berilse birinshi kezekte, tólemniń kóteriletinine senimdi. Ata-ananyń qaltasy kótermegennen keıin muǵalimder jumystan qysqartylyp, naǵyz toqyraýǵa tap bolatynyna úreıli. Óner shańyraǵynyń erteńgi kúnine alańdaǵan 40-qa jýyq saz mektebiniń ustazdary arasha surap, Taldyqorǵan qalasynyń ákimine bardy. Sebebi, Tilendıev atyndaǵy mektep qalalyq ákimdik balansynda. Biraq óner ujymynyń: «Ákim qabyldasyn», - degen talaby oryndalmady. Ustazdarmen ákim emes, orynbasary kezdesti.
«414 bala túrli úıirmede bilim alady. Erteń jeke qojaıyn keledi de, birinshi kezekte tabys tabý úshin árıne, tólemdi kóteredi. Áleýmettik jaǵynan osal balalar ony qalaı tóleıdi. Qazir onsyz da bári qymbat. Sodan keıin úıirmede qysqartý bastalady. Bizge kıeli Nurǵısa Tilendıev atyndaǵy saz mektebiniń tenderge túsip jatqanyn tipti, dırektor da aıtpady. Óner ujymynda jalpy 60 adam eńbek etedi», - deıdi Nurǵısa Tilendıev atyndaǵy saz mektebiniń muǵalimi Marat Aıkenov.
Pedagogtar mekemeniń jeke kásipkerdiń qolyna ótkenin aspaptardy sanaýǵa kelgen adamdardan bilgenin aıtady. Al Taldyqorǵan qalasynyń ákimdigi mýzykalyq mektep túbegeıli jekege ótpeıtinin málim etti. Tek 15 jylǵa senimgerlikpen basqarýǵa beriledi.
«Nurǵısa Tilendıev atyndaǵy mektep ákimshiliginiń kelisýimen qazan aıynda senimgerlik basqarý boıynsha tender ótkizildi. Nátıje boıynsha, «MUSIC DEVELOPMENT» JShS jeńimpaz retinde tanylyp otyr. JShS-ny basqaryp otyrǵan Tilendıeva Dınara Nurǵısaqyzy», - dedi Taldyqorǵan qalasy ákiminiń orynbasary Sáýle Arzanbekova.
Taldyqorǵan qalasy ákimdigi mektepti senimgerlikke berýge saz mekemesiniń basshylyǵy usynys jasaǵanyn jetkizdi. Al mekeme ujymy ózderiniń pikirimen sanaspaı, sheshim qabyldaǵan dırektordyń jumystan ketýin talap etip otyr. Ustazdardyń ashýyn týdyrǵan dırektor bolsa, qandaı da bir pikir bildirýden bas tartty.
