Jeke úılerge órt jáne ýly gaz datchıkterin ornatý jumystary qalaı júrip jatyr
ASTANA. KAZINFORM — Úkimet otyrysynan keıingi brıfıngte Tótenshe jaǵdaılar mınıstri Murat Muhanov elimizde azamattardyń qaýipsizdigin qamtamasyz etý sharalary jóninde málimdedi.
— Bıyl shamamen 13 myń datchık ornatyldy. Bul jumystar tıimdiligin kórsetti. Atap aıtqanda, 68 datchık der ýaqytynda iske qosylyp, sonyń arqasynda 290 adamdy ajaldan qutqaryp qalý múmkin boldy. Mundaı sharalar jalǵasady. Búgin Premer-mınıstr de oblystar men ákimderge osy jumysty jalǵastyrýǵa tapsyrma berdi, — dedi ol.
Sonymen qatar, mınıstr atalǵan datchıkterdiń paıdalaný merzimi 10 jylǵa deıin ekenin aıtty. Biraq olar batareıamen jumys isteıdi. Demek, úıge ornatylǵan soń, turǵyndar qurylǵynyń qýaty taýsylmaǵanyn tekserip, ýaqytynda batareıasyn aýystyryp otyrýy kerek.
— Qazir tizimde áleýmettik osal toptar turatyn 93 myń úı bar. Datchık ornatý máselesinde ázirge sondaı úılerge basa mán berip otyrmyz. Óıtkeni, onda múgedektigi bar jandar t. b. áleýmettik múmkindigi shekteýligi azamattar turady. Jalpy, «Azamattyq qorǵanys týraly» Zańǵa, Qurylys kodeksine ózgerister men tolyqtyrýlar engizdik. Aldaǵy ýaqytta barlyq jeke turǵyn úıge datchıkter ornatylýy kerek, — dedi Murat Muhanov.
Aıta keteıik, buǵan deıin órt qaýipsizdigi aılyǵynde birinshi kezekte stýdentter jataqhanalary tekseriletinin jazǵanbyz.