Jeke turǵyn úı qurylysyn damytýǵa baǵyttalǵan baǵdarlama kerek -Aıqyn Qońyrov

NUR-SULTAN. QazAqparat - «Qazaqstan Halyq partııasy» fraktsııasy salymshylardyń zeınetaqy jınaǵyn turǵyn úı jaǵdaıyn jaqsartý úshin paıdalaný jobasynyń aralyq qorytyndysyn shyǵarý mańyzdy dep sanaıdy. Bul týraly Májilistiń jalpy otyrysynda depýtat Aıqyn Qońyrov málim etti, dep habarlaıdy QazAqparat tilshisi.

«313 myńnan astam azamattyń arnaıy shotyna 1 trln 400 mlrd teńge aýdaryldy. Olardyń barlyǵy ózderiniń zeınetaqy jınaǵyn kádelerine jaratty. Bul joba tutas ekonomıkaǵa áser etti. Budan 2 megapolıstegi qurylys ıeleri men bankter paıda kórdi. Alaıda halyqtyń baspanaǵa qoljetimdiligi artqan joq. Másele júıeli túrde sheshilmedi. Turǵyn úı máselesi ýshyǵyp ketti. Jalpy ekonomıkalyq ósimdi yntalandyrý bastamasy da naqty nátıje bermedi. Kerisinshe, turǵyn úı men qurylys materıaldarynyń baǵasy sharyqtaýy saldarynan salaǵa jaǵymsyz áser etip, ınflıatsııanyń údeýine de yqpaly boldy. Zeınetaqy naýqany bastalǵannan beri (2021 jylǵy 1 qańtar) Qazaqstan Respýblıkasyndaǵy páter baǵasy 8,3% -ǵa qymbattady. 2020 jylǵy mamyrdan 2021 jylǵy mamyrǵa deıingi aralyqtaǵy ósim shamamen 22% -dy qurady», - dedi A. Qońyrov Premer-Mınıstrdiń orynbasary Roman Sklıardyń atyna joldaǵan saýalynda.

Onyń aıtýynsha, Monopolııaǵa qarsy agenttik baǵany retteýge tyrysýda. Alaıda baǵanyń ósýi memlekettiń is-áreketinen emes, BJZQ-dan alynatyn birjolǵy zeınetaqy jınaǵy taýsylǵanda toqtaıdy.

«Dúrlikpe suranystyń áleýeti otandyq ónerkásipti damytý úshin paıdalanylmady. Ulttyq statıstıka bıýrosynyń dereginshe, otandyq óndiris tabıǵı shıkizat bolyp sanalatyn qurylys materıaldary resýrstarynda ǵana basym boldy. Sondyqtan zeınetaqy jınaǵymen kóbinese sheteldik jetkizýshiler men otandyq deldaldar ınvestıtsııalandy. Turǵyn úı jaǵdaıyn jaqsartý úshin zeınetaqy jınaǵyn paıdalaný jobasyn jalǵastyra otyryp, ekinshi kezeńde qosymsha júıeli sharalardy iske qosý mańyzdy dep sanaımyz. Ol jeke toptarǵa emes, búkil qoǵamǵa arnalýy kerek. Qazaqstan Halyq partııasy jeke turǵyn úı qurylysyn damytýǵa baǵyttalǵan «Jer úı» baǵdarlamasyn iske qosýdy qajet dep sanaıdy», – dedi depýtat.

Osy oraıda ol memleket qazaqstandyqtardyń basym bóligin sapaly ári qoljetimdi turǵyn úımen qamtamasyz etýge basymdyq berýge tıis dep esepteıdi.

«Jer úı» jeke turǵyn úı qurylysyn damytý baǵdarlamasy qajetti qurylys materıaldarynyń, ilespe taýarlar men kórsetiletin qyzmetterdiń otandyq óndirisin damytý jónindegi sharalarmen súıemeldenýi tıis», - dedi Aıqyn Qońyrov.