Jeke turǵyn úı ıelerin jaýapkershilikke tartpaımyz - TJM

TALDYQORǴAN. QazAqparat – Jeke turǵyn úı ıeleri jaýapkershilikke tartylmaıdy. Bul týraly Jetisý oblysy halqymen kezdesýi barysynda Tótenshe jaǵdaılar mınıstri ıÝrıı Ilın aıtty, dep habarlaıdy QazAqparat vedomstvonyń baspasóz qyzmetine silteme jasap.

Mınıstr respýblıka boıynsha 1 qazannan bastalǵan jylytý maýsymy kezeńinde profılaktıkanyń mańyzdylyǵyna nazar aýdardy. Daıyndyq tamyz aıynda bastalady. Jylytý maýsymy boıy turǵyn úı sektorynda peshterdi, elektr jabdyqtaryn, sondaı-aq gaz jabdyqtary men ballondardy paıdalaný jáne saqtaý boıynsha ádistemelik kómek kórsete otyryp, profılaktıkalyq reıdter ótkiziledi.

«Jeke turǵyn úı sektoryn jaýapkershilikke tartpaıtynymyzdy, ózimizdi jáne otbasymyzdy órt pen kómirtegi totyǵymen ýlaný jazataıym oqıǵalarynan qalaı qorǵaýǵa bolatyny týraly usynystar beretinimizdi atap ótkim keledi. 15 tamyzdan bastap 3 myńnan astam reıd júrgizildi, 5 myń turǵyn úıde órt qaýipsizdiginiń buzylýy anyqtaldy (qyzdyrý aspaptarynyń janynda janǵysh materıaldardy saqtaý, peshtiń ústinde zattardy keptirý jáne t.b.), onyń ishinde 3 myń úıde olqylyqtar joıyldy, qalǵandaryna usynystar berildi. Barlyǵy 50 myńnan astam jeke úı profılaktıkamen qamtylǵan», - dedi ıÝrıı Ilın.

Sonymen qatar, mınıstr ataýly kómek kórsetý úshin halyqtyń osal toptarynyń, ıaǵnı kóp balaly, turmysy tómen otbasylar, zeınetkerler men múgedekterdiń turǵyn úıleriniń sany anyqtalatynyn aıtty. Qyrkúıek aıynan bastap ákimdikpen jáne úkimettik emes uıymdarmen birlesip 809 dabyl qurylǵysy ornatylǵan.

Aıta ketsek, 2021 jyly mınıstrlik turǵyn úılerdi órt dabyly jáne gaz bólinýin baqylaý júıelerimen mindetti jaraqtandyrýdy zańnamalyq túrde engizdi. Buryn bul normalar tek ǵımarattar, bıiktigi 10 qabatty jáne odan da joǵary kóppáterli turǵyn úıler úshin qarastyrylǵan bolatyn.