Jeke turǵyn úıdi jalǵa alý sýbsıdııasy kimderge beriledi

ASTANA. KAZINFORM — Jeke turǵyn úıdi jalǵa alý aqysyn sýbsıdııalaý týraly buıryqqa Ónerkásip jáne qurylys mınıstriniń mindetin atqarýshy 2025 jylǵy 30 sáýirde qol qoıdy.

Qujat resmı jarııalanǵannan keıin 2025 jylǵy 24 mamyrda kúshine enedi.

Sýbsıdııany kimder ala alady

Memlekettik qoldaý tegin negizde turǵyn úıge muqtaj retinde kezekte turǵan jáne respýblıkalyq biryńǵaı elektrondyq baza men «Turǵyn úımen qamtamasyz etý ortalyǵy» júıesine tirkelgen azamattarǵa beriledi. Sýbsıdııa kelesi sanattarǵa taǵaıyndalady:

— І jáne ІІ toptaǵy múgedektigi bar adamdar;
— múgedektigi bar balalardy tárbıelep otyrǵan otbasylar;
— 29 jasqa deıingi jetim balalar men ata-anasynyń qamqorlyǵynsyz qalǵan balalar;
— «Altyn alqa», «Kúmis alqa» belgilerimen jáne «Ana dańqy» І jáne ІІ dárejeli ordenderimen marapattalǵan kópbalaly analar;
— kópbalaly otbasylar.

Sýbsıdııa qalaı esepteledi

Sýbsıdııa mólsheri jalǵa alý tóleminiń 50%-yn quraıdy. Bul soma bıýdjet esebinen tólenedi, ıaǵnı 80% — respýblıkalyq bıýdjetten, 20% — jergilikti bıýdjetten. Qalǵan 50%-yn jalǵa alýshy ózi tóleýi tıis.

Memleket tek jeke turǵyn úı qoryndaǵy páterlerge tólem jasaıdy — memlekettik turǵyn úıdi jalǵa alýǵa sýbsıdııa berilmeıdi. Sonymen qatar, týystardan nemese jubaılardan (burynǵy jubaıyn qosa alǵanda) páter jaldaýǵa bolmaıdy.

Tabys pen turǵyn úı aýdanyna qatysty shekteýler bar

Sýbsıdııa alý úshin otbasynyń sońǵy 6 aıdaǵy jıyntyq tabysy otbasynyń árbir múshesine bir aılyq eń tómengi kúnkóris deńgeıinen aspaýy kerek. Áleýmettik jáne zeınetaqy tólemderi, múgedek balalardy kútýge baılanysty járdemaqylar men jetim balalarǵa arnalǵan memlekettik stıpendııalar tabys quramyna kirmeıdi.

Sýbsıdııalanatyn turǵyn úıdiń eń joǵarǵy ruqsat etilgen aýdany:

— 1–3 adamnan turatyn otbasy úshin — 40 sharshy metrge deıin;
— 4–5 adamnan turatyn otbasy úshin — 60 sharshy metrge deıin;
— 6 jáne odan da kóp adamnan turatyn otbasy úshin — 80 sharshy metrge deıin.

Eger jalǵa alynǵan turǵyn úıdiń aýdany shekti mólsherden asyp ketse, sýbsıdııa tek belgilengen norma sheginde proportsıonaldy túrde esepteledi.

Ótinishti qalaı berý kerek

Sýbsıdııa alý úshin www.otbasybank.kz saıty arqyly ótinish berý qajet. Ótinish 3 jumys kúni ishinde qaralady. Oń sheshim shyqqan jaǵdaıda arnaıy shot ashylady, oǵan aı saıyn sýbsıdııa aýdarylady. Shart — jalǵa alýshy óz úlesin (50%) aldyn ala engizýi tıis.

Júıe málimetterdiń ashyq tekserilýin kózdep otyr, oǵan salyqtyq aqparat, zeınetaqy aýdarymdary, otbasy quramy jáne basqa da derekter jatady. Eger talaptarǵa saı kelmegen jaǵdaıda, azamat bas tartý aldynda tyńdalýǵa quqyly.

Baqylaý jáne jaýapkershilik

Jergilikti atqarýshy organdar turǵyn úıdiń maqsatty paıdalanýyn toqsan saıyn tekserýge mindetti. Eger baspanany úshinshi tulǵalar paıdalansa nemese týystarmen jalǵan shart jasalǵany anyqtalsa, sýbsıdııa toqtatylady jáne qalpyna keltirilmeıdi. 

Aıta ketsek, bıyl sáýirde memlekettik turǵyn úı qorynan baspana berý qaǵıdalary bekitildi. 

Eske salaıyq, bıyl elimizde rekordtyq kólemde turǵyn úı paıdalanýǵa beriledi. Bul týraly Premer-mınıstrdiń orynbasary Serik Jumanǵarın Úkimet otyrysynda málimdegen edi.