Jeke tulǵanyń turǵyn úıin kepil retinde qabyldaýǵa shekteý engiziledi -zań jobasy

NUR-SULTAN. QazAqparat – Májilistiń jalpy otyrysynda «Salyq jáne bıýdjetke tólenetin basqa da mindetti tólemder týraly» QR Kodeksine (Salyq kodeksi) jáne «Salyq jáne bıýdjetke tólenetin basqa da mindetti tólemder týraly» QR Kodeksin (Salyq kodeksi) qoldanysqa engizý týraly» QR Zańyna ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Zań jobasy Memleket basshysynyń jekelegen tapsyrmalaryn, bıznes pen azamattardy qoldaý jónindegi bastamalardy, salyqtyq ákimshilendirýdi jaqsartý jónindegi sharalardy, onyń ishinde kóleńkeli ekonomıkaǵa qarsy is-qımylǵa baǵyttalǵan sharalardy iske asyrý maqsatynda ázirlendi.

Parlamenti Májilisiniń Qarjy jáne bıýdjet komıtetiniń málimetine qaraǵanda, atalǵan zań jobasynyń aıasynda:

- shıkizat eksportynan túsken valıýtalyq túsimniń keminde 50%-yn shetel valıýtasyn teńgege aıyrbastaýdy júzege asyrǵan bıznes sýbektileriniń taýarlardyń eksporty kezinde 80 paıyzǵa deıingi mólsherde QQS-ty ońaılatylǵan tártippen qaıtarýdy júrgizý;

- salyq tóleýshiniń pasportyn engizý;

- Prezıdenttiń 2021 jylǵy 1 qyrkúıektegi Qazaqstan halqyna Joldaýynda berilgen tapsyrmasyn oryndaý maqsatynda eń tómen jalaqyny eseptik kórsetkish retinde ony eń tómen eseptik kórsetkishke (AEK) aýystyrý jolymen paıdalanýdy alyp tastaý;

- salyq tóleýshilerdi jeke tulǵalardy aldaǵy tólemder men salyqtyq qaryzdar týraly, onyń ishinde bankterdiń mobıldik qosymshalary jáne «Azamattarǵa arnalǵan úkimet» KEAQ arqyly habardar etý;

- 2021 jylǵy 1 qańtardan bastap júk kótergishtigine qaraı júk avtomobılderi úshin belgilengen mólsherlemeler boıynsha jekelegen kólik quraldaryna salyqty esepteý quqyǵyn berý;

- salyqtardy tóleý boıynsha bir jyldan astam merzimge tek jyljymaıtyn múlik kepilimen nemese bank kepildigimen bólip tóleý usynylady. Jeke tulǵanyń turǵyn úıin kepil retinde qabyldaýǵa shekteý engiziledi.