Jeke tulǵanyń bankrottyǵy: Bank jalǵyz baspanany qaı jaǵdaıda alýǵa quqyly

NUR-SULTAN. QazAqparat – Jeke tulǵalardyń bankrottyǵyn retteıtin zań jobasyn tanystyrǵan Memlekettik kirister komıteti tóraǵasynyń orynbasary Qaırat Mııatov jalǵyz baspanany qaı jaǵdaıda bank alyp qoıa alatynyn túsindirdi, dep habarlaıdy QazAqparat tilshisi.

«Somasy 4,9 mln teńgeden asatyn boryshtardyń barlyǵy boıynsha azamattar sot arqyly bankrottyq rásimdeı alady. Bul rásim barysynda boryshkerdiń múlki saýda-sattyqta satylýy múmkin. Zańnyń mańyzdy tustarynyń biri osy. Sondyqtan da bul sot bankrottyq sot arqyly rásimdeledi. Ár másele sotta tyńǵylyqty qaralýy kerek. Túsken qarajat kredıtorlarǵa kezektilik boıynsha óteýge jiberiledi», - dedi Qaırat Mııatov.

Zań jobasyndaǵy jalǵyz baspanany alyp qoıý máselesi Úkimetke ózgerissiz jiberilgeni atap ótildi.

«Jalǵyz baspana kepilge qoıylǵan bolsa, kredıtor ony sot bankrottyǵy barysynda alyp qoıýǵa quqyly bolady. Eger jalǵyz baspana kepil bolmasa, kredıtorlar oǵan ótinish bere almaıdy. Qalǵan ótelmegen soma boryshker múlki bar ekenin jasyryp, jalǵan aqparat bermegen bolsa, esepten shyǵarýǵa jatady.

Alaıda, alıment jáne basqa adamnyń ómiri men densaýlyǵyna keltirilgen zalal boıynsha qaryzdar esepten shyǵarýǵa jatpaıdy», - dedi Memlekettik kirister komıteti tóraǵasynyń orynbasary.

Buǵan deıin habarlaǵanymyzdaı, zań jobasynda jeke tulǵanyń bankrottyǵyn rásimdeýdiń úsh joly usynylyp otyr. Olar: sottan tys bankrottyq, sot arqyly bankrottyq jáne azamattardyń tólem qabiletin qalpyna keltirý.