Jeke tulǵalarǵa arnalǵan avtolızıng baǵdarlamasy qaıta iske qosylady
ASTANA. KAZINFORM — Qazaqstanda jeke tulǵalarǵa arnalǵan avtolızıng baǵdarlamasy jaqynda qaıta iske qosylady. Bul týraly Úkimettegi baspasóz máslıhatynda Ónerkásip jáne qurylys mınıstri Ersaıyn Naǵaspaev málimdedi.
Mınıstrdiń aıtýynsha, baǵdarlama 2025 jylǵy 1 jeltoqsanda pılottyq rejımde iske qosylyp, birneshe aı jumys istegen. Osy ýaqyt aralyǵynda quqyqtyq jáne tehnıkalyq sıpattaǵy birqatar másele anyqtalǵan.
— Salalyq memlekettik organdardan kóptegen eskertý tústi. Mysaly, jol qozǵalysy erejesin buzǵany úshin salynatyn aıyppuldy kim tóleıtini, salyqty óndirip alý máseleleri kóterildi. Al Jasandy ıntellekt jáne tsıfrlyq damý mınıstrligi barlyq tsıfrlyq júıeler men derekter bazasynyń tolyq ıntegratsııalanbaǵanyn aıtty. Memlekettik organdardan túsken barlyq usynysty jınaqtadyq. Qazir qajetti ózgeristerdi maquldaýdyń sońǵy kezeńi júrip jatyr, — dedi Ersaıyn Naǵaspaev.
Óz kezeginde «Qazaqstannyń ónerkásiptik ınvestorlar odaǵy» ZTB prezıdenti Qaırat Elamanov buǵan deıin qarjylyq lızıng tetiginiń qaǵıdalarynda baǵdarlamany iske asyrýdyń keıbir sharttary men lızıngtik kompanııalarǵa qoıylatyn talaptar tolyq qamtylmaǵanyn aıtty.
Onyń aıtýynsha, bul máselelerdiń barlyǵy Mashına jasaý jáne kólik máseleleri jónindegi zańda eskerilgen.
— Qazir osy zańdy iske asyratyn zańǵa táýeldi normatıvtik akt maquldanyp jatyr. Jalpy, lızıngtik kompanııalar baǵdarlamany qaıta bastaýǵa daıyn. Qujat kúshine engennen keıin bul týraly qosymsha habarlanady, — dedi Qaırat Elamanov.
Ersaıyn Naǵaspaevtyń aıtýynsha, baǵdarlama qaǵıdalaryna engiziletin ózgerister memlekettik organdarda kelisýdiń sońǵy satysynda tur. Olar jaqynda qabyldanady.
Buǵan deıin Ersaıyn Naǵaspaev ERG-di bólý týraly aqparatqa pikir bildirgen edi.
