Jeke tulǵalardyń mobıldi aýdarymdary boıynsha ólshemsharttar ázirlendi
QR QM Memlekettik kirister komııtetinde bankter málimetterdi bergende qandaı kórsetkishterdi eskeretini josparlanǵany týraly aıtyp berdi, dep habarlaıdy QazAqparat.
Qazaqstan Respýblıkasy Qarjy Mınıstrligi «Jeke tulǵalardyń banktik shottarynda júrgiziletin operatsııalardy kásipkerlik qyzmetti júzege asyrýdan kiris alý belgileri bar operatsııalarǵa jatqyzý ólshemsharttaryn, ekinshi deńgeıdegi bankterdiń jáne bank operatsııalardyń jekelegen túrlerin júzege asyratyn uıymdardyń kásipkerlik qyzmetti júzege asyrýdan kiris alý belgileri bar operatsııalarǵa jatqyzylǵan jeke tulǵalardyń banktik shottarynda júrgiziletin operatsııalar boıynsha málimetterdi usyný qaǵıdalaryn, nysany men merzimin bekitý týraly» Qazaqstan Respýblıkasy Qarjy mınıstriniń buıryǵynyń jobasyn ázirlendi.
Kásipkerlik qyzmetti júzege asyrýdan kiris alý belgileri bar operatsııalardyń krıterıılerine mynalar jatqyzylǵan:
jeke tulǵa 3 kúntizbelik aı qatarynan banktik shotyna aı saıyn ár túrli 100 jáne odan kóp adamdardan aqsha qarajattaryn alyp otyrýy.
Salyq kodeksiniń sheńberinde 2025 jylǵa deıin ekinshi deńgeıdegi bankter memlekettik kirister organdaryna málimetterdi jeke tulǵalardyń mynadaı sanattary boıynsha kezeń-kezeńimen beriletinin kózdeıdi.
1-kezeń.
2022 jylǵy 1 qańtardan bastap memlekettik qyzmetkerler men olarǵa teńestirilgender jáne olardyń jubaılary (zaıyptary) boıynsha aqparat beriledi.
2-kezeń.
2023 jylǵy 1 qańtardan bastap bıýdjettik mekemelerdiń qyzmetkerleri jáne olardyń jubaılary (zaıyptary), kvazımemlekettik sektor sýbektileriniń qyzmetkerleri jáne olardyń jubaılary (zaıyptary), boıynsha aqparat beriledi.
3-kezeń.
2024 jylǵy 1 qańtardan bastap zańdy tulǵalardyń basshylary, quryltaıshylary jáne olardyń jubaılary (zaıyptary), dara kásipkerler jáne olardyń jubaılary (zaıyptary) boıynsha aqparat beriledi.
4-kezeń.
2025 jylǵy 1 qańtardan bastap halyqtyń qalǵan barlyq sanattary boıynsha aqparat beriledi.
2023 jyly ekinshi deńgeıdegi bankter jáne bank operatsııalarynyń jekelegen túrlerin júzege asyratyn uıymdar 1-kezeńniń tulǵalary boıynsha málimetterdi usynýdy josparlap otyr.
«Buıryq jobasy jeke tulǵalardyń, adal salyq tóleýshilerdiń jeke aýdarymdaryn qozǵamaıdy jáne salyq monıtorıngin júrgizý kezinde tıimdilikti arttyrýǵa, Qazaqstan Respýblıkasy zańnamasynyń normalaryn saqtaýǵa jáne salyq tóleýden jaltarýdyń aldyn alýǵa baǵyttalǵan», - dep atap ótti MKK-de.
