Jeke tulǵalardyń kólik, jer jáne múlik salyǵyna ózgerister engizildi

NUR-SULTAN. QazAqparat - Memleket basshysy Salyq kodeksine jáne «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń Kodeksin qoldanysqa engizý týraly» Qazaqstan Respýblıkasynyń Zańyna qol qoıdy. Osy zańǵa sáıkes jeke tulǵalardyń kólik, jer jáne múlik salyǵyn tóleý bóliginde birqatar ózgerister bar.

Jeke tulǵalardyń kóligine salynatyn salyq

Jeke tulǵalardyń salyq mindettemelerin durys esepteý jáne kólik quraldaryn ıelenýdiń naqty merziminiń ózgerýine baılanysty artyq tólemniń paıda bolýyn boldyrmaý, kólik quraldaryna qate (artyq) tólengen salyqty qaıtarýǵa baılanysty áýre-sarsańǵa salýdy boldyrmaý maqsatynda jeke tulǵalardyń kólik quraldaryna salynatyn salyqty tóleý merzimi esepti jyldan keıingi jyldyń I - toqsanynyń sońyna aýystyrylady.

Bul norma turaqty bolyp tabylady. Zańda osy normanyń 2020 jyldan bastap qoldanylýy kózdelgen, ıaǵnı 2020 jylǵy mindettemeler boıynsha 2021 jyly tólem júrgizý kózdelgen.

Jeke tulǵalardyń múlik jáne jer salyǵyn biriktirý

Atalǵan salyqtardy biriktirý salyq elementterin (salyq salý obektisi, salyq bazasy, mólsherlemeler, esepteý jáne tóleý tártibi) ózgertpeı júzege asady.

Bul jaǵdaıda jer ýchaskeleri men múlik boıynsha salyq qoldanystaǵy tártipke sáıkes jeke-jeke esepteledi. Bul rette salyq tóleýshige tólenýge tıis soma bir bıýdjettik synyptama kodymen usynylady.

Osylaısha, bul norma jeke tulǵalar úshin tóleý tártibin jeńildetedi. Zańda bul normany 2020 jyldan bastap engizý kózdelgen, ıaǵnı 2021 jyly 2020 jylǵy mindettemeler boıynsha múlik pen jerge biriktirilgen salyqty tóleý kózdelgen.

Kóppáterli turǵyn úılerdiń menshik ıeleri úshin jer salyǵyn joıý

Kóp páterli turǵyn úılerdegi páterler (bólmeler) ornalasqan jer salyǵyn tóleýden bosatý týraly norma ákimshilendirýdiń kúrdeli bolýyna (páterge (bólmege) keletin úlesti, onyń alańyn aıqyndaý, jer salyǵynyń somasyn esepteý bóliginde) jáne osy salyqty esepteý men jınaýǵa jumsalatyn shyǵyndardyń aqtalmaýyna baılanysty.

Osylaısha, kez kelgen salyq salý, eń aldymen, «salyq» túsiminiń ákimshilik shyǵyndardan edáýir joǵarý bolýy kerek, salyqtyq ákimshilendirý arzan bolýy kerek – degen qaǵıdaǵa basshylyqqa alynǵan.

Zańda bul normany engizý 2020 jyldan bastap kózdelgen, ıaǵnı 2020 jyly osy jer ýchaskeleri úshin jer salyǵy tólenbeıtin bolady. Bul norma jeke tulǵalar úshin salyq aýyrtpashylyǵyn jeńildetýge baǵyttalǵan.