Jeke tulǵalardy múlkin saqtandyrýǵa yntalandyrý arqyly úkimet tabıǵı apattardan bolatyn táýekeldi jeńildete alady - Kompetenz kompanııasynyń basqarýshy dırektory
ALMATY. 11 maýsym. QazAqparat - Jeke tulǵalardy óz múlkin saqtandyrýǵa yntalandyrý arqyly úkimet tabıǵı apattardan bolatyn táýekeldi jeńildete alady.
Kompetenz saqtandyrý kompanııasynyń qarjy jónindegi basqarýshy dırektory Azat Atambaev QazAqparat tilshisine bergen suhbatynda osyndaı pikir bildirdi.
«Halyqtyń saqtandyrý naryǵy týraly saýaty áli jetkilikti deńgeıde emes. Kóp adamdar saqtandyrýdyń paıdasyn jete túsinbeıdi. Olar saqtandyrýshylar tek aqsha jınaýmen aınalysyp, qandaı da bir oqys jaǵdaı bolǵanda saqtandyrý tólemin tóleýden jaltaryp ketedi dep oılaıdy. Shyndyǵynda bul olaı emes», - deıdi A. Atambaev. Onyń aıtýynsha, saqtandyrý qyzmetiniń tıimdiligine kólikti saqtandyrý arqyly kóz jetkizgender az emes. Árıne, saqtandyrý qyzmetiniń bul túrin damytýǵa memleket tarapynan da úlken qoldaý jasaldy. Endi ony turǵyn úı qoryn saqtandyrýǵa da paıdalanýǵa bolady.
«Qazir memleket barlyq táýekeldi óz moınyna júktep alǵan. Bul bir kúni iri shyǵynǵa ushyratýy múmkin. Onyń belgisin sý tasqyny sııaqty tabıǵı apattar kezinde kózben kórdik. Alaıda odan ázirge eshkim sabaq alyp otyrǵan joq. Bul jaǵdaı úkimetti de, jeke tulǵalardy da oılandyrý tıis. Memlekettik quzyrly organdar arnaıy komıssııa quryp, belgili bir esepteýler júrgizý arqyly múliktiń ornalasqan jeri, ondaǵy táýekel deńgeıi sııaqty kórsetkishter arqyly saqtandyrý kólemin, syıaqy mólsherin belgileýi tıis», - deıdi Azat Sultanuly.
