Jeke tulǵalardyń tólenbegen aıyppuldary tolyq nemese ishinara esepten shyǵarylmaq
ASTANA. KAZINFORM — Jeke tulǵalardyń tólenbegen aıyppuldary tolyq nemese ishinara esepten shyǵarylmaq. Bul týraly Úkimet otyrysynda Іshki ister mınıstri Erjan Sádenov aıtty.
— Prezıdenttiń tapsyrmasyna sáıkes, raqymshylyq týraly zań qabyldanǵannan keıin ony iske asyrýǵa qatysamyz. Ol azamattar men memlekettiń qaýipsizdigine qater tóndirmeıtin jekelegen qylmystyq jáne ákimshilik quqyq buzýshylyq jasaǵan adamdarǵa qoldanylady dep boljanyp otyr, — dedi mınıstr.
Erjan Sádenovtiń dereginshe, olardyń qataryna qaýipti, onyń ishinde terrorıstik, ekstremıstik jáne sybaılas jemqorlyq sıpatyndaǵy, azaptaý qylmystaryn jasaǵan adamdar, sonymen qatar retsıdıvıster men izdeýde júrgender jatpaıdy.
— Budan basqa ákimshilik-raqymshylyq aıasynda jeke tulǵalardyń oryndalmaǵan aıyppuldaryn tolyq nemese ishinara esepten shyǵarý máselesin qaraý josparlanyp otyr. Mundaı sanattaǵy adamdardyń sany, aıyppuldardyń mólsheri men esepten shyǵarý tártibi zań jobasyn ázirleý barysynda ýákiletti organdarmen tolyq pysyqtalady, — dedi ol.
Buǵan deıin Premer-mınıstr Oljas Bektenov eki aptada raqymshylyq jasaý tetikteri boıynsha usynys ázirleýdi tapsyrǵan edi.
