Jeke tulǵalardyń qaryzy alaıaqtyqtan saqtandyryla ma– UB jaýaby

ASTANA. KAZINFORM – Ulttyq bank tóraǵasy Tımýr Súleımenov Májilis depýtattarynyń jeke tulǵalardyń qaryzdaryn alaıaqtyqtan mindetti saqtandyrýdy engizýge qatysty saýalyna jaýap berdi.

«Halyqaralyq tájirıbede onlaın banktik qyzmetteri kezinde tutynýshylardy qorǵaý tetikteriniń biri retinde azamattardy alaıaqtardyń zańsyz áreketterinen saqtandyrý keńinen taralǵan. Mundaı saqtandyrý negizinen erikti sıpatqa ıe, al saqtanýshy retinde jeke tulǵalar da, bankterdiń ózderi de, tólem júıeleriniń operatorlary da áreket etedi», - dedi Tımýr Súleımenov.

Onyń dereginshe, Qazaqstanda saqtandyrý uıymdary AT-ınfraqurylymyndaǵy kútpegen ózgerister nátıjesinde bank kartalarynyń ıelerine keltirilgen múliktik zııandy óteýge baılanysty saqtandyrý ónimderin usynady.

«Alaıaqtyqtan saqtandyrýdy mindetti nemese júktelgen saqtandyrý túri retinde engizý alaıaqtyq operatsııalar boıynsha statıstıkany taldaýdy, tutynýshyǵa zııan keltirmesten saqtandyrýdyń barabar qunyn esepteý úshin yqtımal shyǵyndar mólsherin anyqtaýdy eskere otyryp, jan-jaqty zertteýdi qajet etedi. Sonymen qatar, jeke tulǵalardyń qaryzdaryn alaıaqtyqtan mindetti saqtandyrýdy engizý kredıtti resimdeý kezinde qosymsha shyǵystarǵa ákeledi. Nátıjesinde onyń qymbattaýyna ákep soǵady»,- dedi Ulttyq bank tóraǵasy.