Jeke tulǵalardyń 2024 jylǵy kólik salyǵyn tóleý merzimi qashan aıaqtalady

ASTANA. KAZINFORM - Memlekettik kirister komıteti jeke tulǵalardyń 2024 jylǵa arnalǵan kólik salyǵyn tóleý merzimi 2025 jyldyń 1 sáýirinde aıaqtalatynyn eske saldy.

QR QM Memlekettik kirister komıtetiniń baspasóz qyzmetiniń habarlaýynsha, 2024 jylǵa arnalǵan salyqty esepteý kezinde 2024 jyly qoldanysta bolǵan 3 692 teńge kólemindegi aılyq eseptik kórsetkish qoldanylady.

Kólik quraldary salyǵy somasyn kgd.gov.kz veb-portalyndaǵy kalkýlıatordyń jáne «e-Salyq Azamat» mobıldi qosymshasynyń kómegimen derbes esepteýge bolady.

Bul rette salyq organdary esep aıyrysý balansyn anyqtaý úshin jyl saıyn tıisti jylǵa jeke tulǵalardyń kólik quraldaryna salynatyn salyqty esepteıdi.

Eseptelgen salyq somalary týraly aqparat 2025 jylǵy 11 naýryzdan 31 naýryzǵa deıin ekinshi deńgeıli bankterdiń mobıldi qosymshalaryn paıdalanýshylarǵa PUSH habarlamasy túrinde jiberiledi.

Sondaı-aq, salyq somasy týraly aqparat kgd.gov.kz veb-portalyndaǵy «Jeke tulǵalar úshin aldaǵy tólemder» qyzmetinde, sondaı-aq «e-Salyq Azamat» jáne ekinshi deńgeıli bankterdiń mobıldi qosymshalarynda ornalastyrylady.

Osyǵan deıin eski kólik salyǵy 50%-ǵa tómendeıtini týraly jazdyq.