Jeke sot oryndaýshylaryna qosymsha ókilettik berilmek

NUR-SULTAN. QazAqparat – Elimizde jeke sot oryndaýshylaryna qosymsha ókilettik berilmek. Bul týraly búgin Májilistegi Úkimet saǵatynda Ádilet mınıstri Qanat Mýsın aıtty, dep habarlaıdy QazAqparat tilshisi.

«Búginde alıment tóleýshini ákimshilik jaýapkershilikke tartý úshin oǵan hattama toltyrý qajet. Jeke sot oryndaýshysynda mundaı quqyq joq. Bul úshin ol boryshkerdi ádilet organdaryna alyp kelip, ol jerde ádilet organdarynyń laýzymdy tulǵasy tıisti ákimshilik hattama toltyrady. Bul rette boryshker barǵysy kelmese, onda ony polıtsııa ǵana májbúrlep apara alady», - dedi mınıstr.

Onyń atap ótýinshe, osy jaıtqa baılanysty boryshker adamdy jaýapkershilikke tartý uzaq ýaqytty alyp jatady.

«Eger zańnamada jeke sot oryndaýshysyna ákimshilik hattama toltyrý quqyǵy beriletin bolsa, onda bul zań buzýshylar sanyn eselep qysqartyp, olardy tez jazalaýǵa septigin tıgizer edi. Sol arqyly boryshty óteýge múmkindik beredi. Qazirgi ýaqytta atqarýshylyq óndiris týraly jańa zań tujyrymdamasyn ázirlep jatyrmyz. Onda sot oryndaýshylaryna dál osyndaı ókilettik engizemiz. Óıtkeni, bul – problemany sheshýdiń tıimdi quraldarynyń biri. Tolyqtaı alǵanda, oblys ákimdikterimen memorandým jasalyp,bos jumys oryndary jármeńkesi turaqty ótkiziledi. Olarǵa jumysy joq boryshkerlerdiń kelýin qamtamasyz etýge tyrysamyz. Ótken jyly alıent boıynsha bereshegi 2,5 myń boryshkerdi jumysqa ornalastyrdyq. Tipti áleýmettik jumystar ótkizýge de tyrysamyz», - dedi Qanat Mýsın.