Jeke sot oryndaýshylary Irak Elekeevtiń saılanýyn zańsyz dep tanýdy surady

ASTANA. QazAqparat - Jeke sot oryndaýshylar Qazaqstan Respýblıkasynyń Jeke sot oryndaýshylarynyń respýblıkalyq palatasy basqarma tóraǵasyn qaıta saılaýdy surap otyr, dep habarlaıdy QazAqparat tilshisi Ádilet mınıstrliginiń baspasóz qyzmetine silteme jasap.

11 shilde kúni birqatar BAQ betterinde QR Jeke sot oryndaýshylarynyń respýblıkalyq palatasy basqarma tóraǵasy bolyp Irak Elekeevtiń saılanǵany týraly aqparat taraǵan bolatyn.

«Osydan keıin QR Ádilet mınıstrligine Prezıdıýmnyń birqatar múshelerinen Prezıdıýmdy zańsyz dep taný, sheshimniń kúshin joıý, sondaı-aq ony ótkizýdegi kóptegen buzýshylyqtarǵa baılanysty Jeke sot oryndaýshylarynyń respýblıkalyq palatasynyń birinshi basshysynyń aýysýyn tirkeýden bas tartý týraly ótinimder kelip tústi. Atalǵan shaǵymdarǵa súıensek, basqarma Prezıdıýmnyń múshelerin shaqyrmastan, kún tártibin talqylaýsyz telefon baılanysymen daýys berýdi ótkizbek bolǵan. JSO respýblıkalyq palatasy birinshi basshynyń aýystyrylatyny týraly Astana qalasynyń Ádilet departamentine tıisti habarlama jiberýi tıis bolatyn», - delingen habarlamada.

Ádilet mınıstrligi jaýapty organ retinde quqyqtyq alań aıasynda barlyq jeke sot oryndaýshylardyń ustanymyn esepke ala otyryp, máseleni konstrýktıvti túrde sheshýdi usyndy.

Eske sala ketsek, Irak Elekeev Jeke sot oryndaýshylar palatasynyń basqarma tóraǵasy bolǵany týraly buǵan deıin jazǵan bolatynbyz.