Jeke sot oryndaýshylary ınstıtýty sot sheshimderiniń 100 paıyz oryndalýyn qamtamasyz etedi - Joǵarǵy sot ókili
ASTANA. Sáýirdiń 5-i. QazAqparat /Aıdar Ospanalıev/ - Qazirgi tańda elimizdegi sot aktileriniń oryndalý kórsetkishi talapqa saı emes.
Jylyna elde sot aktileriniń nebári 75-80 paıyzy ǵana oryndalady. Jeke sot oryndaýshylary ınstıýtyn engizý sot sheshimderiniń 100 paıyzǵa deıin oryndalýyn qamtamasyz etedi. Bul týraly búgin buqaralyq aqparat quraldarynyń ókilderimen bolǵan baspasóz máslıhatynda Joǵarǵy sot janyndaǵy Sot ákimshiligi komıteti tóraǵasynyń birinshi orynbasary Baqtııar Ónerbaev málim etti, dep habarlaıdy QazAqparat.
Onyń sózine qaraǵanda, búgingi tańda elde 1 myń 791 sot oryndaýshysy bar. Al zańda kórsetilgen talaptar boıynsha sot oryndaýshylarynyń sany eldegi jumys istep jatqan sýdıalardyń sanymen birdeı bolýy kerek. «Respýblıkadaǵy sýdıalar sanynyń 2 myń 433 ekendigin eskersek, bizge áli 600-deı sot oryndaýshysy qajet. Sonymen qatar aıta ketetin másele, ýaqyt ótken saıyn halyqtyń saýaty, onyń ishinde quqyqtyq saýaty erekshe artyp keledi. Nátıjesinde qoǵam arasynda daý týdyrǵan kóptegen máseleler negizinen sottyń qaraýymen sheshilýde. Nátıjesinde sotta qaralatyn ister jyldan jylǵa artyp keledi. 2009 jyly sot júıesinde qaralǵan ister sany 1 mıllıonǵa jýyq boldy», dedi Komıtet tóraǵasynyń orynbasary.
