Jeke sot oryndaýshylar palatasynyń tóraǵasy men tóralqa basshysy saılandy
ASTANA. QazAqparat - Búgin Astanada jeke sot oryndaýshylarynyń quryltaı jıyny bolyp ótti. Munda jańadan qurylǵan Respýblıkalyq jeke sot oryndaýshylary palatasynyń Jarǵysy maquldanyp, sonymen qatar, quryltaıdyń músheleri Respýblıkalyq jeke sot oryndaýshylary palatasy tóralqasynyń tóraǵasy laýazymyna Amangeldi Abdollovty, al palata tóraǵasy laýazymyna Sergeı Lıdi saılady.
Bul týraly QR Ádilet mınıstrliginiń baspasóz qyzmeti habarlady.
Quryltaıdyń jumysyna eldiń barlyq aımaqtarynan jeke sot oryndaýshylary, sonymen qatar Ádilet mınıstrliginiń, Respýblıkalyq jeke sot oryndaýshylary palatasynyń uıymdastyrylýy jáne onyń Jarǵysy týraly óz pikirin bildirý úshin Májilis jáne Senat Parlamentiniń depýtattary qatysty.
Aldymen, Respýblıkalyq palata jeke sot oryndaýshylary qyzmetin uıymdastyrýmen, óziniń jáne palata músheleriniń quqyqyǵy men múddelerine ókildik etýine jáne jeke sot oryndaý ınstıtýtyn damytýǵa óz baǵytyn aıqyndaıtynyn málimdedi.
Sondaı-aq, aımaqtarda palatanyń bólimsheleri ashylady. Atalmysh sharalar jyldyń basynda «Atqarýshylyq is júrgizý jáne sot oryndaýshylarynyń mártebesi týraly» Zańyna «Qazaqstan Respýblıkasynyń keıbir zańnamalyq aktilerine Qazaqstan Respýblıkasynda kásipkerlik qyzmet úshin jaǵdaıdy túbegeıli jaqsartý máseleleri boıynsha ózgerister men tolyqtyrýlar engizý týraly» Zańymen engizilgen túzetýlerge sáıkes jasaldy. Endi oǵan sáıkes aımaqtardaǵy alqalardaǵy múshelikte bar jeke sot oryndaýshylary biriktirilgen Respýblıkalyq palataǵa kirýi tıis. Barlyǵy respýblıkada 300-ge jýyq lıtsenzııalanǵan jeke sot oryndaýshy bar.
