Jeke sot oryndaýshylar akkredıtatsııadan ótýge mindetteledi

ASTANA. KAZINFORM — Parlament jeke sot oryndaýshylardy akkredıtatsııadan ótýge mindetteıtin zań jobasyn qarap jatyr. Bul týraly Premer-mınıstr Oljas Bektenov Senat depýtatynyń saýalyna joldaǵan jaýapta aıtqan.

— Ádilet mınıstrligi Parlament depýtattarymen birge atqarýshylyq is júrgizý mehanızmderin jetildirýge, sondaı-aq jeke sot oryndaýshylarynyń zańsyz áreketteri úshin jaýapkershiligin kúsheıtýge baǵyttalǵan zańnamalyq túzetýler ázirledi. Atap aıtqanda, usynylyp otyrǵan zańnamalyq ózgerister jeke sot oryndaýshysy qyzmetimen aınalysýǵa lıtsenzııa alýǵa qoıylatyn talaptardy qatańdatýdy, oqýdan (biliktiligin arttyrýdan) ótý merzimderiniń kezeńdiligin (3 jyldan 2 jylǵa deıin) qysqartýdy, jumys istep júrgen jeke sot oryndaýshylaryn mindetti attestattaýdy engizýdi, qyzmettik ókilettikterin teris paıdalanǵany úshin qatań sanktsııalar belgileýdi, tártiptik jazany merziminen buryn (6 aıǵa deıin) alyp tastaýdy joqqa shyǵarýdy, ákimshilik sharalardy qoldanýdy, sot oryndaýshysynyń is-áreketiniń ashyqtyǵyn qamtamasyz etýdi kózdeıdi, — dep jazady Oljas Bektenov.

Sondaı-aq, Premer-mınıstr jeke sot oryndaýshylardyń zań buzý faktileri bar ekenin moıyndaǵan. 

— Osyǵan baılanysty Ádilet mınıstrligi Bas prokýratýrasynyń usynýy boıynsha jeke sot oryndaýshylaryna qatysty sharalar qabyldady (kináli tulǵalar tártiptik jaýapkershilikke tartyldy jáne lıtsenzııalardan aıryldy). Kórsetilgen sharalarmen qatar zańdylyqty saqtaý men ýaqtyly sharalar qabyldaý turǵysynan jeke sot oryndaýshylarynyń qyzmetine únemi qashyqtan monıtorıng júrgiziledi, — delingen jaýapta.

Eske salsaq, sáýir aıynda Májiliste ótken Úkimet saǵatynda Sot oryndaýshylar «Otbasy bank» salymshylarynan 3,4 mlrd teńge jymqyrǵany málim bolǵan edi.