Jeke seriktestik Almaty oblysyna 60 myń maska berdi

TALDYQORǴAN. QazAqparat – Almaty oblysyndaǵy kompanııa QHR-daǵy bıznes seriktesterimen birge gýmanıtarlyq kómek retinde óńirge 60 myń tegin medıtsınalyq maska jetkizdi, dep habarlaıdy QazAqparat tilshisi.

Koronavırýspen kúres sharalary úshin Qazaqstanǵa jalpy sany 228 myńnan astam bir rettik paıdalanatyn úsh qabatty medıtsınalyq maska tegin berildi.

«Jiaxin International Resources Investment Co., Ltd» korporatsııasynyń vıtse-prezıdenti, «Jetisý Volframy» JShS atqarýshy dırektory Nazar Terlyganyń aıtýynsha, medıtsınalyq maskany jetkizý Qazaqstan Respýblıkasynyń Syrtqy ister jáne Densaýlyq saqtaý mınıstrlikteriniń, sol sııaqty Qyzyl Jarty Aı qoǵamynyń tikeleı qoldaýymen júzege asyrylǵan.

«Kompanııa óziniń strategııalyq seriktesteriniń biri «Jiangxi Cooper Corporation» korporatsııasymen birge Qazaqstannyń Qyzyl jarty aı jedel qyzmeti arqyly kómek kórsetýde. Gýmanıtarlyq kómek kórsetý - jumysymyzdyń bir bóligi», - dedi ol.

Atap ótsek, atalmysh kompanııa volfram kenin óndirýge mamandanǵan. Investıtsııalyq joba byltyrdan beri Eńbekshiqazaq aýdanynda júzege asyrylýda, qazir 400 jumys orny ashylǵan.