Jeke sektor mamandary memlekettik laýazymdy qyzmetterge kelip jatyr
ASTANA. KAZINFORM – Memlekettik qyzmet isteri agenttiginiń tóraǵasy Darhan Jazyqbaı Almaty qalasynda ótken halyqaralyq Human Capital forum-na qatysty.
Іs-shara barysynda Darhan Jazyqbaı jeke qurylymdar jáne memlekettik organdardyń HR-qyzmetteri arasyndaǵy áriptestikti nyǵaıtý, memlekettik qyzmetke jeke sektordan bilikti kadrlardy ashyq, kedergisiz qabyldaý mańyzdylyǵy jaıly aıtty.
- Osyǵan baılanysty biz merıtokratııa qaǵıdatyn jetekshilikke ala otyryp jeke qurylymdardyń joǵary bilikti mamandary úshin memlekettik qyzmette mindetti eńbek ótili bolýyn talap etetin kedergilerdi zań júzinde alyp tastadyq, - dep atap ótti agenttik tóraǵasy.
Onyń aıtýynsha, qazirgi ýaqytta osy jańashyldyqtyń arqasynda «B» korpýsynyń basshylyq laýazymdaryna 806 taǵaıyndaý kelisilip, jeke sektordyń mamandary ortalyq jáne jergilikti atqarýshy organdarda departament dırektorlary men basqarma basshylary laýazymdaryna ornalasty. Sondaı-aq kelisimsharttyq qyzmetshiler ınstıtýty engizilip, qazirdiń ózinde 30 salalyq sarapshy basym memlekettik jobalarmen jumys istep jatyr.
- Mundaı ekijaqty kelisimde jumys jasaý memlekettik qyzmetke jańa serpin beredi, - dedi Darhan Jazyqbaı.
Onyń atap ótýinshe, memlekettik basqarýdyń servıstik, adamǵa baǵdarlanǵan modelin qalyptastyrý memlekettik apparattyń basty mindetteriniń biri sanalady.
«Memlekettik organdar men jeke qurylymdardyń HR-qyzmetterin adamı kapıtaldy damytý, personaldyń turaqtylyǵyn qamtamasyz etý, qyzmetkerlerdiń óz qabiletin tıimdi paıdalanýy úshin qolaıly jaǵdaılar jasaý syndy ortaq mindetter biriktiredi. Bolashaq adamdarmen jumys jasaı alatyndardyń qolynda. Adamdar, olardyń bilimi, kásibıligi, bastamashylyǵy, adaldyǵy, jaýapkershiligi – Qazaqstannyń basty strategııalyq resýrsy. Memleket basshysynyń jańa HR saıasaty osy ustanymǵa negizdelgen, - dedi ol.
Sondaı-aq Agenttik tóraǵasy forým qatysýshylaryna Prezıdenttiń bastamasymen iske asyrylyp jatqan talantty jastar úshin tıimdi áleýmettik lıft sanalatyn Qazaqstannyń aýqymdy HR jobasy Prezıdenttik jastar kadrlyq rezervi týraly aıtty.
Jobany qolǵa alǵannan bastap rezervke 400 adam qabyldanyp, olardyń 80 paıyzdan astamy ártúrli salalardaǵy orta jáne joǵary basshylyq laýazymdarǵa taǵaıyndaldy.
Darhan Jazyqbaı «E-Qyzmet» jáne «Biryńǵaı kadr júıesi» portaldarynyń jumysyna da toqtaldy. Bul aqparattyq júıeler memlekettik qyzmetke irikteýdiń ashyqtyǵyn, kandıdattardy tańdaý barysynda adamı faktordy boldyrmaýdy qamtamasyz etedi, sondaı-aq belgili bir uıymdaǵy úlestestikti jáne múddeler qaqtyǵysyn anyqtaýǵa kómektesedi. Onlaın irikteý júıesi memlekettik qyzmetke kirýge úmitkerler men táýelsiz sarapshylar tarapynan oń pikirlerge ıe boldy.
Forýmǵa elimizdegi HR salasyndaǵy jetekshi mamandar men bıznes-kóshbasshylar, Qazaqstan tarabynyń shaqyrýymen Ázerbaıjan, Armenııa, Grýzııa, Qyrǵyzstan jáne Ózbekstan elderinen memlekettik organdar ókilderi qatysyp, onda jahandyq tsıfrlandyrý jáne ınnovatsııalardy engizý jaǵdaıynda memlekettik qyzmette personaldy basqarý máseleleri talqylandy.
Human Capital forum – Qazaqstan HR-menedjerler qaýymdastyǵy uıymdastyrǵan túrli salalardyń sarapshylaryn biriktiretin, tıimdi kórsetkishterge qol jetkizý úshin personaldy basqarýdy transformatsııalaýdy kózdeıtin alań.
Osyǵan deıin Memlekettik qyzmetshilerdi zańsyz is-áreketterden qorǵaý qalaı júzege asatyny týraly materıaly jarııaladyq.