Jeke sektor ekonomıkalyq ósim men jumys oryndaryn qurýdyń qozǵaltqysh kúshi bolýy tıis
ASTANA. QazAqparat - Jeke sektor Qazaqstandaǵy ekonomıkalyq ósim men jumys oryndaryn qurýdyń jetkilikti qozǵaltqysh kúshine aınalýy tıiss. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Ulttyq ekonomıka mınıstrligine qarasty «Ekonomıkalyq zertteýler ınstıtýty» AQ basqarma tóraǵasynyń orynbasary Áset Erǵalıev málim etti.
Instıtýt ókiliniń paıymynsha, álemdik ekonomıkanyń damý trendteri búgingi tańda túrlishe qubylyp tur. Máselen, sońǵy onjyldyqta memlekettik suranys pen munaı baǵasyna negizdelgen ekonomıkalyq ósim úlgisiniń kemshil tustary da aıqyn bilingen.
«Sondyqtan da, osynyń ornyn basatyn jeke sektor ekonomıkalyq ósim men jumys ornyn qurýdyń jetkilikti qozǵaltqyshyna aınalýy tıis. Bul degenińiz qurylymdyq reformalardy belsendirý talap etiletinin bildiredi, sonyń ishinde ásirese bıznes-ortany jaqsartý, memlekettik basqarý tıimdiligin arttyrý, bilim berý sapasyn kóterý asa ózekti. Osylar arqyly jeke sektor túpki nátıjede tabysty damyp, ekonomıkalyq ósim úshin ózin ózi tolyq qamtıtyn qozǵaltqyshqa aınalýy shart», - dedi Á. Erǵalıev.
Toqtala ketetin jaıt, Memleket basshysy Úkimettiń keńeıtilgen otyrysynda negizgi qurylymdyq reformalar qajettigin aıtqan bolatyn. «Jalpy memlekettik suranysqa negizdelgen ekonomıkalyq úlgini ustanǵan elderde uzaqmerzimdi jospar ornyqsyz bolatyny belgili. Sondyqtan da, qazirgi kúni jeke sektordy damytý úshin barlyq jaǵdaılardy jasaǵan mańyzdy», - dedi Á. Erǵalıev.
