Jeke sáıkestendirý nómirleri (JSN) joq týý týraly kýálikterdi jańa jylǵa deıin aýystyrýdyń qajeti joq - Komıtet tóraǵasy
ASTANA. 7 jeltoqsan. QazAqparat /Gúlmıra Alıakparova/ - Jeke sáıkestendirý nómirleri (JSN) joq týý týraly kýálikterdi jańa jylǵa deıin aýystyrýdyń qajeti joq.
Bul týraly búgin Astanada ótken baspasóz máslıhatynda QR Baılanys jáne aqparat mınıstrligi Memlekettik qyzmetterdi avtomattandyrýdy baqylaý jáne Halyqqa qyzmet kórsetý ortalyǵy (HQKO) qyzmetin úılestirý komıtetiniń tóraǵasy Baqyt Ábishev málim etti.
Qazaqstanda árbir azamatqa Jeke sáıkesendirý nómirin belgileý 1997 jyldan bastalǵanymen, 1996-2007 jyldar aralyǵynda týǵan balalardyń týý týraly kýálikterine JSN jazylmaı kelgen. 2012 jyldyń 1 qańtarynan bastap Áleýmettik jeke kod (ÁJK) pen Salyq tóleýshiniń nómiri (STN) qoldanystan alynyp, olardyń ornyna JSN júretindikten, Jeke sáıkestendirý nómirleri joq eresekter ózderiniń jeke kýálikterimen birge balalarynyń da týý týraly kýálikterin aýystyrýǵa kirisken. Mınıstrlik ókili anyqtaǵandaı, JSN-ny joq týý týraly kýálikterdi aýystyrýdyń qajeti joq.
«Qazir jekelegen óńirlerde JSN-ny joq týý týraly kýálikterdi aýystyrýǵa qatysty dúrbeleń júrip jatyr. Mysalǵa, Shymkentte ekinshi apta boldy, adamdar HQKO-larǵa balalarynyń týý týraly kýálikterin aýystyrýǵa alyp kelýde. Zańǵa sáıkes JSN-ny joq barlyq týý týraly kýálikter jaramdy bolyp tabylady. JSN-ny joq bolǵany úshin olardy aýystyrýdyń qajeti joq. Sebebi, memleketpen taǵaıyndalatyn qandaı da bir járdemaqylar balaǵa ata-ananyń JSN-ny boıynsha beriledi. 1996-2007 jyldar aralyǵynda týǵan balalarǵa JSN-dy 2012 jyldyń birinshi toqsanynan bastap josparly túrde mektepter arqyly beretin bolamyz. Týý týraly kýálikterge JSN jazylǵan qosymsha bet qosylady», - dep naqtylady B.Ábishev.
B.Ábishev atap kórsetkendeı, búgingi kúnge deıin Qazaqstanda jeke kýálikterinde JSN-ny joq 250 myńǵa jýyq azamat qalyp otyr. Komıtet tóraǵasy, Jańa jyldan bastap bul azamattar eski qujattar boıynsha qandaı da bir zańdy kelisimder jasap, áleýmettik tólemder men zeınetaqylardy ala almaıtyndyǵyn eske saldy. Onymen birge, aǵymdaǵy jyldyń sońyna deıin qazaqstandyqtar JSN-ny joq eski kýálikterin jańasyna tegin aýystyrsa, 2012 jyldyń 1 qańtarynan bastap 303 teńge tóleıtin bolady.
