Jeke sáıkestendirý nómirin berý isinde qosymsha uıymdastyrý sharalary atqarylýy qajet - Ý. Qalıjan
ASTANA. Mamyrdyń 5-i. QazAqparat /Qanat Mámetqazyuly/ ‑ Jeke sáıkestendirý nómirin berý isinde qosymsha uıymdastyrý sharalary atqarylýy qajet. Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Ýálıhan Qalıjan osylaı málim etti,
dep habarlaıdy QazAqparat.
«Jurtshylyq arasynda azamattardyń jeke kýáligi men tólqujatyna jeke sáıkestendirý nómiriniń engizilýine baılanysty úlken qobaljýlar oryn alyp otyr. 2010 jylǵy tamyzdyń 13-inen bastap Qazaqstanda azamattardyń tıisti qujattarynda JSN bolmaǵan jaǵdaıda ondaı qujattardyń kúshi bolmaıtyndyǵy belgili. Osy kún jaqyndaǵan saıyn jurtshylyq arasyndaǵy dúrbeleń de ulǵaıyp barady», dedi depýtat. Onyń aıtýynsha, búgingi kúni Halyqqa qyzmet kórsetý ortalyqtarynda uzyn-sonar kezekter qalyptasyp, tipti bul máselege «ádettegideı» deldaldar da aralasyp jatqan kórinedi.
«Rasynda qoldanystaǵy zańǵa sáıkes elimizde jeke sáıkestendirý nómirlerin engizý 1997 jyldan bastalsa, onyń aıaqtalý merzimi bıylǵa belgilengen. Biraq, memlekettik organdar osy aralyq kezeńde jurtshylyq úshin aqparattyq habarlandyrý jumystaryn tıisti deńgeıde júrgizgen joq. Tipti qazirdiń ózinde qazaqstandyqtar arasynda JSN alýǵa qatysty túrli alypqashpa áńgimeler oryn alýda. Bunymen qosa, HQO men ádilet organdary qyzmetkerleri tarapynan bir birine qarama qaıshy aqparattar berilip jatyr. Máselen, olardyń biri tamyzdyń 13-inen keıin JSN berý aqyly bolatynyn aıtsa, endi bireýleri múldem basqasha aıtady», deı kele depýtat Ý. Qalıjan bul máselede áli de kóp saýaldardyń bar ekendigin alǵa tartty.
Osy máselelerge toqtala kele depýtat, qujattar boıynsha JSN berý isinde áli de qosymsha uıymdastyrý sharalaryn atqarý qajettigine nazar aýdartady. «Bul rette ádilet organy qyzmetkerleri men halyqqa qyzmet kórsetý ortalyǵynyń jumysyn belsendire túsý qajet. Tipti olardyń demalys kúnderi men táýlik boıy qyzmet etýin qamtyǵan da oryndy», dedi Ý. Qalıjan.
