Jeke sáıkestendirý nómiri joq azamattar bıylǵy jylǵy tamyzdyń 13-ine deıin ádilet organdaryna mindetti túrde barýy kerek

Bul týraly búgin Astanada ótken brıfıngte Ádilet mınıstrligi Taldaý jáne strategııalyq josparlaý departamenti dırektorynyń orynbasary Erbolat Erimbet málim etti, dep habarlaıdy QazAqparat.

«Jeke kýáliginde jáne tólqujatynda Jeke sáıkestendirý nómiri (JSN) joq azamattar bıylǵy jylǵy tamyzdyń 13-ine deıin ádilet organdaryna nemese Halyqqa qyzmet kórsetý ortalyqtaryna mindetti túrde barýy qajet. Sebebi, atalǵan merzimnen keıin JSN-i joq jeke kýálik pen tólqujattar jaramsyz bolyp qalady»,-dedi ol.

Onyń aıtýynsha, atalǵan qujattardy JSN-i bekitilgen qujatqa aýystyrý tegin júrgiziledi.

Atap aıtqanda, JSN el azamattarynyń tólqujattarynda 1997 jyldan beri basylyp keledi.

E. Erimbettiń sózine qaraǵanda, tamyzdyń 13-inen bastap Salyq tóleýshiniń tirkeý nómiri men Áleýmettik jeke kod bolmaıdy. Tıisti tirkeý sharalary tek qana JSN arqyly júrgiziledi.

«Biraq aıtar keńesim, Salyq tóleýshiniń tirkeý nómiri men Áleýmettik jeke kodyn joǵaltpaı saqtap qoıý kerek. Al negizi tamyzda JSN áreket etetin bolady»,- dedi ol.

Aıta keteıik, 12 sannan turatyn JSN jeke kýáliktiń betki jaǵynda týǵan kúnniń málimetteri jazylǵan jolaqtyń astynda belgilengen. Al tólqujatta ol 32-shi bette basylǵan.

«2007 jyly Zań qabyldanǵan bolatyn. Sodan beri 3 jyldyń ishinde 15 mıllıonnan astam el azamattaryna JSN basylǵan jeke kýálikter berildi. Endi qalǵan adamdardyń qujattaryn aýystyrý kerek»,-dedi ol.

Sonymen birge E. Erimbetov zańdy tulǵalar bıylǵy jylǵy tamyzdyń 13-ine deıin Bıznes sáıkestendirý nómirin (BSN) engizý josparlanyp otyrǵandyǵyn jetkizdi.