Jeke ómirge qol suqpaý quqyǵyn Konstıtýtsııa deńgeıinde bekitý usynyldy — Prezıdent
ASTANA. KAZINFORM – Táýelsizdik saraıynda Memleket basshysy Qasym-Jomart Toqaevtyń qatysýymen barlyq deńgeıdegi máslıhat depýtattarynyń ІІІ respýblıkalyq forýmy ótip jatyr. Bul týraly Aqorda habarlady.
— Jemqorlardyń, tipti olardyń sottylyǵy zańda belgilengen tártippen joıylǵanyna nemese alynǵanyna qaramastan, saılanýǵa quqyǵy joq. Bul — óte mańyzdy jańashyldyq dep oılaımyn.
«Turǵyn úıge qol suǵýǵa bolmaıdy» degen bap ta ádildik qaǵıdatyna tolyq saı keledi. Jańa Konstıtýtsııa jobasynda «Sot sheshiminsiz turǵyn úıden aıyrýǵa jáne shyǵaryp jiberýge jol berilmeıdi» dep naqty jazylǵan.
Negizgi zańda advokatýra ınstıtýty bekitilip, sondaı-aq Mıranda erejesi engiziledi. Buryn-sońdy mundaı bolǵan joq. Osy arqyly azamattyń sotta qorǵalý jáne zań kómegin alý quqyǵyna memleket beretin kepildik kúsheıedi.
Jeke ómirge qol suqpaý quqyǵyn Konstıtýtsııa deńgeıinde bekitý usynyldy. Bul jerde tek jeke salymdar men jazysqan hattardyń qupııasyn zańmen qorǵaý týraly sóz bolyp otyrǵan joq.
Bank operatsııalarynyń, derbes derekterdiń qupııalyǵyn qamtamasyz etý Konstıtýtsııa boıynsha qorǵalady. Tsıfrlyq tehnologııa men qarjy sektory qaryshtap damyǵan qazirgi zamanda bul ózekti máselege aınaldy.
Budan bólek, Qazaqstanda derbes derekter men tsıfrlyq quqyqtyń qorǵalýyna kepildik berýdi Negizgi zań deńgeıinde bekitý josparlanyp otyr, — dedi ol.
Prezıdent memlekettiń, ásirese, bilim berý júıesiniń zaıyrly sıpatqa ıe bolýy aıryqsha mańyzǵa ıe ekenin aıtty.
— Alǵash ret bilim men ǵylymdy, ınnovatsııany damytý memleket qyzmetiniń konstıtýtsııalyq qaǵıdaty retinde tanylmaq. Memlekettiń, ásirese, bilim berý júıesiniń zaıyrly sıpatqa ıe bolýy aıryqsha mańyzǵa ıe.
Biz tórtkúl dúnıeniń daryndaryn ózimizge tartyp, ınvestıtsııasyn ıgeretin myqty elge aınala alamyz. Oǵan áleýetimiz jetedi. Bul — adam kapıtalynyń sapasyn arttyrý baǵytyndaǵy jumystyń mańyzdy bóligi.
Sondyqtan zııatkerlik menshikti tuńǵysh ret Konstıtýtsııa deńgeıinde qorǵaý usynylyp otyr. Bul, óz kezeginde, kreatıvti ekonomıkanyń damýyna tyń serpin beredi.
«Azamattarǵa jańa mindetter júkteıtin nemese olardyń jaǵdaıyn nasharlatatyn zańdardyń keri kúshi bolmaıdy» degen norma engizildi.
Osylaısha, biz turaqty ári túsinikti quqyqtyq, ınvestıtsııalyq orta qalyptastyramyz. Azamattarymyz óz quqy buzylmaıtynyn, qorǵalatynyn bilip, olardyń alańsyz ómir súrýine jáne kásipkerlikpen aınalysýyna jaǵdaı jasalady, — dedi Prezıdent.
Sonymen qatar jekelegen aýmaqtar men «qarqyndy damıtyn qalalar» úshin arnaýly quqyq rejımin belgileý usynylyp otyr.
— Osy normaǵa baılanysty elimizdiń aýmaqtyq tutastyǵyna qaýip tóndiredi degen qaýeset taraı bastady. Ádette mundaı aýyr aıyptaýdy álemdik tájirıbeden maqurym, zańnamalyq saýaty joq adamdar aıtady.
Aıtpaqshy, jańa Konstıtýtsııa jobasynda orys tiliniń mártebesin tómendetip jatyr-mys degen kúńkil áńgimege qatysty da osyny aıtýǵa bolady. Bul jaıynda jazylǵan maqalalardy oqýdyń ózi qyzyq. Stılıstıkalyq jáne grammatıkalyq qatelerden aıaq alyp júre almaısyń. Jarııalanym avtorlary orys tili úshin qam jeıdi, biraq ózderi ony durys meńgermegen.
Túptep kelgende, jańa Konstıtýtsııa mátininiń resmı qujat retinde birdeı zańdy kúshke ıe qazaq jáne orys tilderinde jarııalanýy kóp nárseni ańǵartpaı ma? Bul jerde túsinikteme berip, aqtalýdyń ózi artyq, — dedi Toqaev.
Aıta ketelik Prezıdent qatysýymen máslıhat depýtattarynyń ІІІ respýblıkalyq forýmy ótip jatyr.
