Jeke múddeler týraly deklaratsııa engiziledi: jańa talaptyń kimderge qatysy bar
ASTANA. KAZINFORM — 2027 jyldan bastap memlekettik qyzmetshiler men olarǵa teńestirilgen adamdar jeke múddeleri týraly deklaratsııa toltyrady. Jańa talap múddeler qaqtyǵysynyń aldyn alyp, memlekettik sektordaǵy ashyqtyqty arttyrýǵa baǵyttalǵan. Bul týraly Memlekettik qyzmet isteri agenttigi málim etti.
Agenttiktiń dereginshe, Qazaqstan Respýblıkasy Úkimetiniń 2026 jylǵy 20 tamyzdaǵy № 746 qaýlysymen Jeke múddeler týraly deklaratsııany toltyrý qaǵıdalary (budan ári – Qaǵıdalar) bekitilgen.
Qaǵıdalar «Qazaqstan Respýblıkasynyń keıbir zańnamalyq aktilerine sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizý týraly» 2026 jylǵy 12 maýsymdaǵy Qazaqstan Respýblıkasy Zańynyń (budan ári – Zań) jáne halyqaralyq usynymdardyń oryndalýyn qamtamasyz etý maqsatynda ázirlengen.
Qazaqstan Respýblıkasy Úkimetiniń qaýlysy 2027 jylǵy 1 qańtardan bastap qoldanysqa engiziledi.
— Jeke múddeler týraly deklaratsııany jaýapty memlekettik laýazymdy atqaratyn adamdar, memlekettik fýnktsııalardy oryndaýǵa ýákilettik berilgen adamdar, laýazymdy adamdar, sondaı-aq memlekettik fýnktsııalardy oryndaýǵa ýákilettik berilgen adamdarǵa teńestirilgen adamdar toltyrady, — delingen agenttik habarlamasynda.
Deklaratsııa memlekettik qyzmetke, memlekettik nemese soǵan teńestirilgen fýnktsııalardy oryndaýǵa baılanysty laýazymǵa túsken, bolmasa qyzmeti (jumysy) boıynsha aýysqan kúnnen bastap 15 (on bes) jumys kúni ishinde toltyrylady.
Bul rette, jeke múddeler týraly deklaratsııany toltyrý mindettemesi Qaǵıdalar qoldanysqa engizilgennen keıin týyndaıdy. Osylaısha, jeke múddelerdi deklaratsııalaý ınstıtýty engizilgenge deıin týyndaǵan quqyqtyq qatynastarǵa jańa talaptar qoldanylmaıdy.
Qaǵıdalarmen jeke múddeler týraly deklaratsııany usyný tártibi jáne deklaratsııanýǵa jatatyn málimetter kólemi aıqyndalady.
Atap aıtqanda, jeke múddeler týraly deklaratsııada mynadaı málimetter kórsetiledi:
- bir memlekettik organda, uıymda nemese kvazımemlekettik sektor sýbektisinde deklarantpen birge jumys isteıtin jaqyn týystary, jubaıy (zaıyby), jekjattary jáne (nemese) basqa da baılanysty tulǵalar týraly;
- basqa da aqy tólenetin qyzmet týraly (pedagogıkalyq, ǵylymı, shyǵarmashylyq nemese ózge de qyzmet);
- Qazaqstan Respýblıkasynda jáne (nemese) shet memleketterde tirkelgen kommertsııalyq uıymdarǵa, jeke kásipkerlikke qatysý, onyń ishinde laýazymǵa taǵaıyndalar aldyndaǵy bir jyl ishindegi qatysý týraly;
- menshik quqyǵyna nemese ózge de zattyq quqyqqa tıesili múlikti senimgerlik basqarýǵa berý týraly.
Sonymen qatar, memlekettik organdarda, uıymdarda nemese kvazımemlekettik sektor sýbektilerinde uıymdastyrýshylyq-ókimdik nemese ákimshilik-sharýashylyq fýnktsııalardy oryndaıtyn adamdar úshin, eger bul zańdy tulǵalar deklaratsııany berý talaby qoldanylatyn adam eńbek qyzmetin júzege asyratyn memlekettik organmen, uıymmen nemese kvazımemlekettik sektor sýbektisimen azamatty-quqyqtyq qatynastarda turǵan jaǵdaıda, jaqyn týystary, jubaıy (zaıyby), jekjattary ıelik etetin jáne (nemese) basqarýǵa qatysatyn aktsııalary (jarǵylyq kapıtalǵa qatysý úlesteri) bar zańdy tulǵalar týraly málimetterdi kórsetý kózdelgen.
Zańda jeke múddeler týraly deklaratsııany usynbaǵany nemese ýaqtyly usynbaǵany úshin tártiptik jaýapkershilik kózdelgenin atap ótken jón.
Jeke múddeler týraly deklaratsııany jınaý fýnktsııalary memlekettik organdardyń, uıymdardyń jáne kvazımemlekettik sektor sýbektileriniń kadr qyzmetterine júkteledi.
Jeke múddelerdi deklaratsııalaý ınstıtýtyn engizý múddeler qaqtyǵysyn boldyrmaýǵa jáne ony retteý tetikterin jetildirýge, sondaı-aq memlekettik sektorda adaldyq qaǵıdattaryn nyǵaıtýǵa baǵyttalǵan.
Aıta keteıik, deklaratsııaǵa qajetti barlyq málimetti jınap úlgermegen qazaqstandyqtar 270.00 nysanyndaǵy kirister men múlik týraly deklaratsııany belgilengen merzimde tapsyryp, keıin derekterdi túzete alady.
