Jekemenshik jataqhanalardyń baǵasy 40 myń teńgeden aspaý kerek – Ǵylym mınıstrligi

ASTANA. KAZINFORM – Ǵylym jáne joǵary bilim mınıstrligi Joǵary jáne joǵary oqý orynnan keıingi bilim komıteti tóraǵasynyń mindetin atqarýshy Aqerke Abylaıhan bıylǵy oqý jylynda stýdentterge arnalǵan jataqhanalardyń quny qansha bolatynyn aıtty.

- Turý qunyna kelsek, Almaty, Astana qalalarynda jataqhananyń aılyq aqysy 20 myń teńgeden bastalady. Ýnıversıtet janyndaǵylardyń baǵasy 30 myń teńgege deıin barady. Al jeke menshik jataqhanalardyń ınvestorlaryna aıtyp otyrmyz. Olar ár stýdentke memleket aqsha alatyndyqtan, qunyn 40 myń teńgeden asyrmańyzdar degen talap qoıyldy, - dedi ol ortalyq kommýnıkatsııalar qyzmetinde ótken baspasóz máslıhatynda.

Komıtet basshysy áleýmettik topqa jatatyn balalarǵa ýnıversıtet janyndaǵy jataqhanalardan oryn tabylmaı jatqanyn rastady.

- Ol azamattar jeke menshik jataqhanalarǵa baryp jatyr. Ol jerde de ýnıversıtet tarapynan 20-50 paıyz jeńildik jasalyp otyr. Sondyqtan jeke menshik jataqhanalarda turý quny 40 myń teńgeden aspaıdy. Al jeke menshik qonaqúıler men hostelderge kelsek, árıne, 60 myń teńgege deıin baratyn bólmeler bar, - dedi Aqerke Abylaıhan.

Buǵan deıin Ǵylym jáne joǵary bilim mınıstri Saıasat Nurbek Almaty qalasynan basqa óńirde jataqhana tapshylyǵy joq degen málimdeme aıtqan bolatyn.