Jeke menshik mektepterdi qysqartý saıasaty bastalyp ketti me – mınıstr jaýaby

ASTANA. KAZINFORM – Oqý-aǵartý mınıstri Ǵanı Beısembaev Úkimet otyrysynan keıin ótken baspasóz máslıhatynda jeke menshik mektepter nege jabyla bastaǵanyn málim etti.

- QazBilim ortalyǵynyń negizin qalaýshy Aıatjan Ahmetjan 2023 jyldan beri jeke menshik mektepterge tólenetin sýbsıdııa keshigip tólenip jatqanyn, saldarynan bıyldyń ózinde 20 mektep jabylyp qalǵanyn aıtty. Mınıstrlik jeke menshik mektepterdiń sanyn qysqartý saıasatyn júrgizip jatyr ma, - dep surady BAQ ókili.

Ǵanı Beısembaev munyń sebebin shaǵyn mektepterdiń ústinen túsetin shaǵym kóbeıip ketkenimen túsindirdi. 

- Bizde sannan sapaǵa kóshý máselesi qolǵa alynyp jatyr. Biz jer-jerde ata-analardan, ákimdikterden kóptegen shaǵym alyp jatyrmyz. Jeke menshik mektepterdiń ashylýyna qatysty beıberekettiktiń oryn alyp jatqandyǵy, mektep orny jetkilikti aýdanǵa mektep ashý jaǵdaılary, materıaldyq-tehnıkalyq turǵydan tolyq jabdyqtamaı, aqsha tabý maqsatymen ǵana jumys isteý faktorlary boıynsha shaǵymdar túsedi. Kezinde jeke menshikterdiń sany 100 bolsa, qazir 900-ge qaraı ketip barady. Sondyqtan olardyń sapasyna baqylaý ornatýymyz kerek. Erteń dál siz sol jeke menshik mektepterdegi sapa týraly suraq qoıyp otyrsańyz men tańǵalmaımyn. Kemshilikterge jol berip qoımaı, báriniń aldyn alýymyz kerek, - dedi ol.

Degenmen ol sońǵy úsh jylda jek menshik mektepterdi memleketten qoldaý kólemi 35 mlrd teńgeden 330 mlrd teńgege deıin artqanyn atap ótti. 

- Búgingi tańda jeke menshik mektepterdiń quryltaıshylarymen, qaýymdastyǵymen kezdesip, sapa týraly áńgime qozǵap otyrmyz. Mekeme jeke menshik bolǵanymen, bala jeke menshik emes. Balalardyń bilimine, qaýipsizdigine kez kelgen mekeme jaýapty. Ony qadaǵalaýdy ózimizge mindet etip alyp otyrmyz. Ol boljamdarmen kelisem, jeke menshik mektepterdiń úlesi 5 paıyzǵa deıin kemýi múmkin. Tıisti jabdyqtarmen jabdyqtalmasa solaı bolady. Joǵary aýdıtorlyq palatanyń tekserýinde málim boldy, jertólede de mektep ashýǵa umtylǵan adamdar bar. Ondaı mektepter, árıne, jabylady. Jeke menshik mektepter qajettilik týyndaǵan jerlerde ǵana ashylý kerek. Ondaı mektepterdi qoldaýǵa daıynbyz. Qazir jeke menshik mekteptermen birlesip tekserý júrgizip, zańsyzdyqtardyń statıstıkasyn anyqtaımyz, - dedi mınıstr. 

Eske salsaq, Joǵary aýdıtorlyq palata tóraǵasy Álıhan Smaıylov Jibek Joly telearnasyna bergen suhbatynda orta bilim berý saıasatyndaǵy turaqsyzdyq bıýdjetke qandaı salmaq túsirip jatqanyn aıtqan bolatyn.